پاراچنار: بارودی سرنگ کے دھماکے میں 4 افراد جاں بحق، 4 زخمی

پاراچنار کے علاقے اپر کرم میں پیواڑ کے سرحدی گاؤں شرم خیل کے قریب بارودی سرنگ کے دھماکے میں 4 افراد جاں بحق اور 4 شدید زخمی ہو گئے۔ واقعہ اس وقت پیش آیا جب مقامی افراد لکڑیاں لینے کے لیے پہاڑی علاقے کی جانب جارہے تھے۔

ڈی پی او ضلع کرم حبیب اللہ کے مطابق، جاں بحق افراد کی شناخت نواب علی، عامر حسین، ہدایت حسین اور منظر علی کے ناموں سے ہوئی ہے، جب کہ زخمیوں میں محمد قونین، شفاعت حسین، حسن غلام اور ایک اور شامل ہیں۔

زخمیوں کو فوری طور پر ڈی ایچ کیو ہسپتال پاراچنار منتقل کیا گیا، جہاں ابتدائی طبی امداد کے بعد انہیں پشاور ریفر کر دیا گیا۔

ڈی ایچ کیو ہسپتال پاراچنار کے میڈیکل سپرنٹنڈنٹ میر حسین نے واقعے کی تصدیق کرتے ہوئے بتایا کہ زخمیوں کی حالت تشویشناک ہے۔

زخمی حسن غلام نے میڈیا سے گفتگو کرتے ہوئے بتایا کہ وہ اپنے ساتھیوں کے ہمراہ پہاڑی کے قریب پہنچے ہی تھے کہ بارودی سرنگ اچانک پھٹ گئی، جس سے وہ شدید زخمی ہو گئے اور ان کے چار ساتھی موقع پر ہی شہید ہو گئے، دھماکے میں دو گھوڑے بھی ہلاک ہو گئے۔

پولیس ٹیمیں فوری طور پر جائے وقوعہ پر پہنچ گئیں اور علاقے کو گھیرے میں لے کر شواہد اکٹھے کیے جا رہے ہیں۔ ڈی پی او کے مطابق واقعے کی ہر پہلو سے تحقیقات جاری ہیں۔

قبائلی عمائدین نے واقعے کی شدید مذمت کرتے ہوئے اسے علاقے میں جاری امن عمل کو سبوتاژ کرنے کی کوشش قرار دیا ہے۔

ان کا کہنا ہے کہ ذمہ داروں کو فوری گرفتار کیا جائے اور واقعے کی اعلیٰ سطحی تحقیقات کرکے عوام کو حقائق سے آگاہ کیا جائے