کراچی: سیمنٹ سے لدے ٹرک نے موٹرسائیکل سوار کو کچل ڈالا، مشتعل افراد نے ٹرک کو آگ لگادی

کراچی کے علاقے ملیر میں سیمنٹ سے لدے ٹرک نے موٹر سائیکل سوار کو کچل ڈالا، 60 سالہ شخص موقع پر جاں بحق ہوگیا، مشتعل افراد نے ٹریلر کو آگ لگادی۔

ملیر کے علاقے سعودآباد میں سیمنٹ سے لدے تیز رفتار ٹرک نے موٹر سائیکل سوار کو کچل ڈالا جو موقع پر جاں بحق ہوگیا، متوفی کی شناخت 60 سالہ باقر کے نام سے ہوئی۔

ریسکیو نے لاش کو ہسپتال منتقل کردیا، واقعے کے بعد مشتعل افراد نے ٹریلر کو آگ لگادی۔

واضح رہے کہ رواں سال کی ابتدا میں کراچی میں اچانک ہیوی ٹریفک سے حادثات اور اموات کی شرح میں اضافہ دیکھا گیا تھا، مسلسل 4 ماہ تک ڈمپرز، ٹرکوں، ٹینکروں کی ٹکر سے درجنوں شہری جاں بحق ہوئے تھے۔

مرنے والوں میں اکثریت موٹرسائیکل سوار شہریوں کی تھی، ان حادثات میں اضافے کے بعد مشتعل عوام کی جانب سے حادثات کے ذمہ دار ٹینکرز کو نذر آتش کرنے کا سلسلہ شروع کر دیا گیا تھا۔

بعد ازاں حکومت نے ٹریفک قوانین پر عملدرآمد میں سختی کی، موٹرسائیکل سواروں کو ہیلمٹ کے بغیر چالان کیے، 43 ہزار موٹرسائیکلیں ضبط کی گئیں، کالے شیشے والی گاڑیوں کو بھی تحویل میں لیا گیا، ہیوی ٹریفک کے لیے ایس او پیز اور ان کے شہر میں داخلے کے اوقات کار پر سختی سے عملدرآمد کرانے کی کوشش کی گئی، جس کے بعد حادثات میں نمایاں کمی دیکھی گئی ہے