چیئرمین نیپرا اور ممبران نے حکومتی منظوری کے بغیر اپنی تنخواہیں 3 گنا تک بڑھادیں

نیشنل الیکٹرک اینڈ پاور ریگولیٹری اتھارٹی (نیپرا) کے اعلیٰ حکام نے وفاقی کابینہ کی لازمی منظوری کے بغیر اپنی تنخواہوں میں 3 گنا تک اضافہ کردیا ہے۔

یہ اضافہ ایک ایسے وقت میں کیا گیا ہے جب پاور سیکٹر کو بڑے پیمانے پر تکنیکی، تجارتی اور ڈسٹری بیوشن خسارے کا سامنا ہے۔

تمام ریگولیٹری باڈیز کے چیئرپرسن اور اراکین عام طور پر زیادہ سے زیادہ مینجمنٹ پوزیشن (ایم پی) اسکیل ون کے حقدار ہوتے ہیں، جس کی بنیادی تنخواہ 6 لاکھ 29 ہزار روپے سے لے کر 7 لاکھ 72 ہزار 780 روپے ماہانہ ہوتی ہے۔

دیگر مراعات، جن میں گھر کا کرایہ ایک لاکھ 46 ہزار سے 2 لاکھ 6 ہزار روپے اور یوٹیلیٹیز کے لیے 35 ہزار روپے شامل ہیں، ان کی مجموعی تنخواہ 8 لاکھ سے 10 لاکھ روپے تک پہنچ جاتی ہے۔

ذرائع کے مطابق نیپرا حکام نے اپنے معاوضوں میں تقریباً 3 گنا اضافے کی منظوری دی۔

ریگولیٹری باڈی کو 10 فروری کو ایک تفصیلی سوالنامہ بھیجا گیا تھا جس میں تنخواہوں میں ترمیم اور حکومت کی منظوری طلب کی گئی تھی، لیکن متعدد یاد دہانیوں کے باوجود کوئی جواب نہیں ملا۔

اس اضافے سے چیئرمین نیپرا کی مجموعی تنخواہ 32 لاکھ 50 ہزار روپے اور عہدیداروں کی مجموعی تنخواہ 29 لاکھ 50 ہزار روپے تک پہنچ گئی ہے۔

نظر ثانی شدہ معاوضہ پیکج میں 7 لاکھ سے 7 لاکھ 73 ہزار روپے کی بنیادی تنخواہ شامل ہے، علاوہ ازیں نیپرا حکام نے ججز کے جوڈیشل الاؤنس کی طرز پر اپنے لیے ماہانہ 6 لاکھ 31 ہزار سے 7 لاکھ روپے ریگولیٹری الاؤنس کی منظوری دے دی ہے۔

انہوں نے 2024 کے لیے 5 لاکھ 87 ہزار روپے سے 6 لاکھ 50 ہزار روپے کا ایڈہاک ریلیف بھی حاصل کیا ہے۔

اس کے علاوہ وہ 2023 کے لیے 5 لاکھ 44 ہزار سے 6 لاکھ روپے کی شرح سے ایڈہاک ریلیف کے اہل بھی ہو گئے ہیں۔

اس کے علاوہ 2022 کے لیے ایک لاکھ 5 ہزار سے ایک لاکھ 16 ہزار روپے ماہانہ اور 2021 کے لیے 70 ہزار سے 77 ہزار 300 روپے ماہانہ ایڈہاک ریلیف کے طور پر گھر کا کرایہ الاؤنس بھی دیا جائے گا۔

ان کی دیگر مراعات میں 96 ہزار روپے اور یوٹیلٹی الاؤنس 32 ہزار سے 35 ہزار روپے شامل ہیں۔

ان کی مجموعی تنخواہوں کا پیکج اب 29 لاکھ 50 ہزار روپے سے بڑھ کر 32 لاکھ 50 ہزار روپے تک پہنچ گیا ہے جو اعلیٰ عدالتوں کے ججز سے بھی زیادہ ہے۔

حکومت کی منظوری لازمی

نیپرا ایکٹ 1997 کے سیکشن 8 میں چیئرمین نیپرا اور اراکین کی تنخواہ، مراعات اور مراعات کا ذکر کیا گیا ہے۔

اتھارٹی کے چیئرمین اور اراکین ایسے معاوضے اور الاؤنسز کے اہل ہوں گے جو اتھارٹی وفاقی حکومت کی منظوری سے طے کرے گی۔

تاہم ذرائع نے ڈان کو بتایا کہ یہ ترامیم حکومت کی منظوری کے بغیر کی گئیں۔

نیپرا ایکٹ کے سیکشن 8 میں یہ بھی کہا گیا ہے کہ چیئرپرسن اور اراکین کے معاوضے اور الاؤنسز ان کے ’کام کی خصوصی نوعیت‘ اور نجی شعبے میں مسابقتی تنخواہوں کی ادائیگی کو یقینی بنائیں گے۔

نیپرا کے زیادہ تر ارکان اور چیئرپرسن عام طور پر ریٹائرڈ بیوروکریٹس ہوتے ہیں جن کی آخری تنخواہ 6 لاکھ سے 7 لاکھ روپے کے درمیان ہوتی ہے۔

اس وقت نیپرا کے چیئرپرسن، کے پی اور بلوچستان سے تعلق رکھنے والے 2 ارکان ریٹائرڈ بیوروکریٹس ہیں۔

نظرثانی کے بعد نیپرا کے 4 ارکان اور چیئرپرسن کی مجموعی تنخواہوں میں سرکاری ملازمین کی حیثیت سے ان کی حتمی تنخواہوں سے 4 گنا سے زیادہ کا اضافہ ہوا ہے۔

ذرائع کا کہنا ہے کہ نیپرا کے ایک عہدیدار نے موجودہ چیئرپرسن اور اراکین کو قائل کیا کہ ان کے پاس حکومت کی منظوری کے بغیر اپنے معاوضوں میں اضافے کا اختیار ہے۔

تنخواہوں میں اس اضافے نے نیپرا اور دیگر ریگولیٹرز کے حکام کے درمیان بھی تضاد پیدا کیا ہے جنہیں وزارت خزانہ کی جانب سے نوٹیفائیڈ ایم پی اسکیل کے تحت معاوضہ دیا جا رہا تھا۔

اس اصول سے مستثنیٰ صرف آئل اینڈ گیس ریگولیٹری اتھارٹی (اوگرا) کی چیئرپرسن تھیں، جو اسپیشل پروفیشنل پے اسکیل کے تحت تنخواہ لے رہی تھیں، جس میں زیادہ سے زیادہ معاوضہ 15 لاکھ سے 20 لاکھ روپے کے درمیان تھا