پی ایس ایل 10: بقیہ میچز کیلئے وارنر سمیت دیگر کھلاڑیوں کی پاکستان آنے کی تصدیق

پاکستان سپر لیگ (پی ایس ایل) کے دسویں ایڈیشن کے لیے کراچی کنگز کے کپتان ڈیوڈ وارنر سمیت دیگر غیر ملکی کھلاڑیوں نے پاکستان آنے کی تصدیق کردی۔
پاکستان کرکٹ بورڈ (پی سی بی) کی جانب سے پی ایس ایل 10 کا حتمی شیڈول جاری کرتے ہی غیر ملکی کھلاڑیوں کی بقیہ میچز کےلیے دوبارہ پاکستان آنے کی تصدیق کا سلسلہ بھی شروع ہوگیا۔

پاکستان سپر لیگ 10 کے بقیہ 8 میچز کھیلنے کے لیے اب تک ہامی بھرنے والے غیرملکی کھلاڑیوں میں کراچی کنگز کے کپتان آسٹریلیا کے ڈیوڈ وارنر ، بین میک ڈرموٹ اور انگلینڈ کے جیمز ونس شامل ہیں۔

لاہورقلندرز کے آل راؤنڈر زمبابوے کے سکندر رضا ، پشاور زلمی کے فاسٹ باؤلر انگلینڈ کے لیوک ووڈ ، ٹام کوہلر کیڈ مور اور افغانستان کے نجیب اللہ زدران بھی پاکستان آنے کو تیار ہیں، کوئٹہ گلیڈی ایٹرز کی ٹیم میں شامل سری لنکا کے کوشل مینڈس بھی بقیہ میچز کھیلیں گے۔

خیال رہے کہ پاکستان کرکٹ بورڈ نے پاک بھارت جنگ کے باعث پی ایس ایل غیر معینہ مدت کیلئے ملتوی کردیا تھا اور پی سی بی نے تمام غیر ملکی کھلاڑیوں کو بحفاظت پاکستان سے رخصت کیا تھا۔

تاہم، اب پی سی بی نے بقیہ میچز کا شیڈول جاری کردیا جس کے تحت راولپنڈی کرکٹ اسٹیڈیم میں لیگ کے آخری 4 میچز کھیلے جائیں گے جب کہ قذافی اسٹیڈیم لاہور پلے آف مرحلے کی میزبانی کرے گا جس میں فائنل بھی شامل ہے۔

دوسری جانب، بھارتی میڈیا رپورٹس کے مطابق آئی پی ایل کا مستقبل تاحال غیر یقینی کا شکار ہے تاہم بھارتی بورڈ نے جنگ بندی کے بعد فرنچائزز کو ہدایت کی ہے کہ وہ اپنے غیر ملکی کھلاڑیوں کو روک لیں۔

تاہم، پاک بھارت کشیدگی کے باعث انڈیا میں موجود آسٹریلیا کھلاڑی شدید صدمے میں ہیں۔

آسٹریلوی فاسٹ باؤلر مچل اسٹارک کی اہلیہ اور ویمنز ٹیم کی کپتان ایلیسا ہیلی انڈین پریمئیر لیگ (آئی پی ایل) کے دھرم شالہ میں اسٹیڈیم میں اچانک لائٹس بند ہونے اور جنگی ماحول کو تلخ تجربہ قرار دیدیا۔

ایسے میں اگر آئی پی ایل کا دوبارہ آغاز ہوجاتا ہے تو آسٹریلوی کھلاڑی انڈین پریمیئر لیگ کے بقیہ میچز کھیلنے کے لیے دوبارہ بھارت جانے سے انکار کرسکتے ہیں