لاہور : وزیراعلیٰ پنجاب مریم نواز نے ”اپنی چھت اپنا گھر“ منصوبے کا افتتاح کردیا۔
منصوبے کی افتتاحی تقریب سے خطاب کرتے ہوئے وزیراعلیٰ پنجاب مریم نواز نے کہا کہ آج پنجاب کے عوام کو خوشخبری دینا چاہتی ہوں، آج وہ سکیم لانچ کرنے جارہی ہوں جس کا مجھے اور میاں نوازشریف سمیت پنجاب کے عوام کو بھی بہت انتظار تھا۔
انہوں نے کہا کہ اپنا گھر اپنی چھت نہ ہوتو انسان کو وہ کمی محسوس ہوتی ہےجس کا لفظوں میں بیان مشکل ہے، مجھ سے پوچھا جاتا تھا آپ اس سکیم کو کب لارہےہیں؟۔ اپنے گھر سے بڑی کوئی نعمت نہیں ہوتی، ہم لوگوں کو جلدی جلدی گھر بناکر بھی دیں گے۔
مریم نواز نے کہا کہ سیکرٹری ہاؤسنگ اور متعلقہ حکام نے اس منصوبے پر بہت محنت سےکام کیا، شہری علاقوں میں 1سے 5مرلے تک زمین ہےتو حکومت آپ کو پیسے دے گی، حکومت پنجاب آپ کو 15لاکھ دے گی جس کو 7سال کی آسان اقساط میں دینا ہے، اس کی ماہانہ قسط 14ہزار روپے ہے ۔
وزیراعلیٰ پنجاب نے کہا کہ احساس ہے کم آمدنی والے افراد کو مشکلات کا سامنا کرنا پڑتا ہے، ہم نے بجلی بلوں میں بھی 45سے50ارب روپے کا ریلیف دیں گے، ہم تاریخ کا سب سے بڑا سولر پروگرام بھی لارہے ہیں۔
مریم نواز کاکہنا تھا کہ جن کے پاس زمین کا ٹکڑا ہے اور اپنی چھت نہیں تو دھیان سے سن لیں، دیہاتی علاقے میں 1سے10مرلے تک زمین ہے تو آپ کو قرضہ دیا جائے گا، ہمارے اس قرضے پر زیرو سود اور انٹرسٹ ہے، حکومت سروس چارجز بھی خود ادا کرے گی کوئی چارجز،انٹرسٹ اور سود ادا نہیں کرنا پڑیں گے ۔
وزیراعلیٰ نے کہاکہ میں نے اس سکیم میں بینک کو نہیں ڈالا،کیونکہ ان کے اپنے لوازمات آجاتے ہیں، ہم نے اپلائی کرنے کا پراسیس بھی آسان کردیا ہے، پنجاب کے تمام شہروں میں یہ پروگرام ایک ساتھ شروع کرنے جارہی ہوں۔
انہوں نے کہا کہ آپ کے پاس زمین کا ٹکڑا ہے تو معلومات متعلقہ ڈی سی آفس سے لے سکتے ہیں، آپ پھاٹا سے بھی معلومات لے سکتے ہیں، میں زمین کا ٹکڑا بھی دیکھ آئی ہوں،جس پر جلد کنسٹرکشن شروع کریں گے، آپ کو زمین کیلئے قرضہ چاہیے تو وہ بھی ہم دیں گے۔
مریم نواز کاکہنا تھا کہ خواب ،خواہش اور ارادہ ہے اس سکیم کو آئندہ 5سال میں پورے پنجاب تک لے کر جائیں گے، اپنا گھر اپنی چھت ہم پانچ چھ بڑے اضلاع میں شروع کرنے جارہے ہیں، پہلے تین ماہ قسط ادا نہیں کرنی ، اللہ کے فضل سے ہر چیز میں پنجاب سبقت حاصل کررہا ہے، پنجاب کو دیکھ کر لوگوں کی دوڑیں لگی ہوئی ہیں۔
ان کامزید کہناتھا کہ میں روزانہ کی بنیاد پر ہر سکیم کو فالو اپ لیتی ہوں، نہ میں خود آرام سے بیٹھتی ہوں نہ اپنی ٹیم کو بیٹھنے دیتی ہوں، آپ دیکھیں گے آئندہ دنوں میں گزشتہ 6ماہ کی محنت رنگ لائے گی، اللہ ہمیں اس نیک مقصد میں کامیاب کرے، اللہ پنجاب کے عوام کیلئے مجھے خوشی کا باعث بنائے۔