وفاقی وزیر ریلوے محمد حنیف عباسی نے راولپنڈی آرٹس کونسل میں جشنِ آزادی کے سلسلے میں منعقدہ تقریب سے خطاب کرتے ہوئے کہا کہ “دنیا سمجھ چکی ہے کہ اللہ کے بعد صرف پاکستان ہی اسرائیل کا مقابلہ کر سکتا ہے”۔

انہوں نے کہا کہ راولپنڈی میں آج بیٹیوں کے لیے بہترین تعلیمی اور سفری سہولیات میسر ہیں۔ ہم نے کسی کو گالی دیے بغیر جیل کاٹی، اور اپنے قائد کے ساتھ چار ماہ قید میں گزارے۔ انہوں نے کہا کہ آج جو شخص جیل میں ہے وہ مجبوری سے وہاں ہے اور گالیاں بھی دے رہا ہے۔

محمد حنیف عباسی نے کہا کہ کچھ لوگوں کی قسمت میں بدبختی لکھ دی گئی ہے، ہمارے لیڈر آف اپوزیشن نے پاکستان پر حملے کے بعد شادیانے بجائے۔ اس بار جشنِ آزادی فاتح کی حیثیت سے منایا جا رہا ہے۔

وفاقی وزیر نے کہا کہ معرکۂ حق کے بعد پاکستان نے اسلامی دنیا میں نمایاں مقام حاصل کیا ہے۔ بھارت ایئر چیف نے دعویٰ کیا کہ چھ پاکستانی جہاز گرائے، جبکہ دنیا نے مانا کہ بھارت کے چھ جہاز پاکستان نے گرائے۔ اگر ہمارا پانی روکا گیا تو بھارت کا ڈیم اڑانے کے لیے دس میزائل داغے جائیں گے۔

انہوں نے کہا کہ بھارت اس خطے کا غنڈہ تھا، جس سے ہم نے اپنا حق چھینا ہے، اور آج بنگلہ دیش میں “پاکستان زندہ باد” کے نعرے لگ رہے ہیں۔ کشمیر کے عوام آزادی اور غلامی کا فرق جانتے ہیں۔ ہندوستان اپنی پراکسی کے ذریعے معصوم شہریوں کو بسوں سے اتار کر قتل کر رہا ہے، مگر پنجابی، بلوچی، کشمیری سمیت ہر پاکستانی پاک فوج کے ساتھ کھڑا ہے۔

محمد حنیف عباسی نے کہا کہ اربوں ڈالر لیبیا اور شام کے پاس بھی تھے مگر جنگ پیسوں سے نہیں جیتی جاتی۔ بھارت آج اس سوچ میں ہے کہ زیادہ جہاز اور فوج رکھنے کے باوجود وہ کیسے ہار گیا۔ ہمارے شہداء کے مجسمے توڑنے والے سزا کے بعد سیاست سے باہر ہو چکے ہیں۔

انہوں نے کہا کہ فوجی جوانوں نے لاہور میں آپ سے پتھر کھائے مگر گولی نہیں چلائی۔ آج پاکستان مضبوط ہاتھوں میں ہے۔ اسلام آباد اور راولپنڈی میں صفائی ستھرائی اور اسپتالوں کے نظام میں زمین و آسمان کا فرق ہے۔

انہوں نے بتایا کہ پونے دو ارب روپے کی لاگت سے راولپنڈی کے اسپتال اپ لفٹ کیے جا رہے ہیں۔ ہم گالیوں کی بنیاد پر نہیں بلکہ کارکردگی کی بنیاد پر عوام کے سامنے بات کرتے ہیں۔