Asim Amin
وزیرداخلہ کا ایرانی ہم منصب سے ٹیلی فونک رابطہ، صدر پزشکیان کے دورہ پاکستان پر گفتگو
وزیرداخلہ محسن نقوی اور ان کے ایرانی ہم منصب سکندر مومنی کے درمیان ٹیلیفونک رابطہ ہوا ہے، ایرانی وزیر داخلہ نے پاکستان میں سیلاب سے ہونے والے جانی و مالی نقصان پر اظہار افسوس کرتے ہوئے جاں بحق افراد کے لواحقین سے دلی ہمدردی و تعزیت کا اظہار کیا۔
ایرانی وزیرداخلہ نے کہا کہ مشکل کی گھڑی میں پاکستانی حکومت اور عوام کے ساتھ کھڑے ہیں، ایران سیلاب متاثرین کی ہر طرح کی مدد کے لیے حاضر ہے۔
ایرانی وزیر داخلہ نے ایرانی صدر مسعود پزشکیان کے 26 جولائی کو دورہ پاکستان کے حوالے سے بھی بات چیت کی۔
ایرانی وزیر داخلہ سکندر مومنی نے حالیہ دورہ ایران پر وزیر داخلہ محسن نقوی کا شکریہ ادا کیا، اس موقع پر محسن نقوی نے کہاکہ ایران کے صدر مسعود پزشکیان کے دورہ اسلام آباد کے منتظر ہیں۔
وزیرداخلہ کا ایف آئی اے ہیڈکوارٹرز کا دورہ
وفاقی وزیر داخلہ محسن نقوی نے ایف آئی اے ہیڈکوارٹر اسلام آباد کا دورہ کیا، محسن نقوی نے ایف آئی اے کے شہدا کی یادگار پر حاضری دی، پھول رکھے، فاتحہ خوانی کی اور عظیم قربانیوں پر شہدا کو زبردست الفاظ میں خراج عقیدت پیش کیا۔
وزیر داخلہ محسن نقوی نے ایف آئی اے ہیڈکوارٹرز میں اعلیٰ سطح کے اجلاس کی صدارت بھی کی، محسن نقوی نے ادارے کو مزید فعال بنانے کے لیے قوانین اور رولز میں ضروری ترامیم پر فوری کام کا آغاز کرنے کی ہدایت کی۔
وزیرداخلہ نے ایف آئی اے کے لیے فوری طور جدید ٹیکنالوجی اور مطلوبہ ہتھیاروں کی منظوری دی، محسن نقوی نے واضح کیا کہ ایف آئی اے کو حکومت کے ساتھ عوام کی توقعات پر پورا اترنا ہو گا، کارکردگی پر ہی ایف آئی اے کو مزید مراعات دی جائیں گی۔
وزیر داخلہ نے ہدایت کی کہ غیر قانونی امیگریشن میں ملوث مافیا سے آہنی ہاتھوں سے نمٹا جائے، بے رحمانہ کریک ڈاؤن کیا جائے اور زیرو ٹالرنس پالیسی اپنائی جائے۔
محسن نقوی نے باور کرایا کہ ملک کی بدنامی کے ذمہ دار عناصر کو روکنا ایف آئی اے کی اولین ذمہ داری ہے، شہریوں کی سہولت کے لیے ایئرپورٹس پر امیگریشن عمل کو آسان اور سہل بنایا جائے۔
وزیر داخلہ نے ایف آئی اے کو فاسٹ ٹریک کاؤنٹر قائم کرنے کی ہدایت کی، وزیرداخلہ محسن نقوی کی نصاب کو جدید خطوط کے مطابق بنانے کی ہدایت کی، اسٹاف کی کمی کے پیش نظر منظور شدہ خالی آسامیوں پر فوری بھرتی کا حکم دیا
