Asim Amin
وزیراعظم شہباز شریف کی ورلڈ بینک کے اعلیٰ عہدیدار سے ملاقات
وزیراعظم محمد شہباز شریف سے عالمی بینک کے مشرق وسطیٰ، شمالی افریقہ، افغانستان اور پاکستان (میناپ) کے ریجنل نائب صدر عثمان ڈیون نے ملاقات کی ہے۔
سرکاری خبر رساں ایجنسی ’اے پی پی‘ کی رپورٹ کے مطابق پرائم منسٹر آفس سے جاری بیان میں بتایا گیا ہےکہ وزیراعظم شہباز شریف نے عالمی بینک کے اعلیٰ عہدیداروں کے ساتھ ملاقات کے دوران سندھ طاس معاہدے جیسے اہم بین الاقوامی معاہدےکو نقصان پہنچانے کے بھارت کے یکطرفہ اور غیر قانونی اقدامات کی روشنی میں پاکستان کے جائز مؤقف کے لیے عالمی بینک کی اصولی حمایت کو سراہا۔
شہباز شریف نے بین الاقوامی قانون کی پاسداری، خوشحالی کے حصول اور علاقائی امن کو برقرار رکھنے کے لیے پاکستان کے عزم کا اعادہ کیا اور تمام مسائل کو بات چیت کے ذریعے حل کرنے کی ضرورت پر زور دیا ہے۔
انہوں نے طویل شراکت داری پر عالمی بینک بالخصوص صدر اجے بنگا اور پاکستان کے لیے ورلڈ بینک کے سابق کنٹری ڈائریکٹر ناجی بن حسائن کا پاکستان کے لیے نئے کنٹری پارٹنرشپ فریم ورک (سی پی ایف) کو آگے بڑھانے میں اہم کردار ادا کرنے پر تہہ دل سے شکریہ ادا کیا۔
وزیراعظم نے پاکستان کی ترقی کی ترجیحات بالخصوص توانائی، انسانی وسائل، ماحولیاتی تبدیلی اور گورننس کے شعبوں میں اصلاحات کےلیے سی پی ایف کے سٹریٹجک کردار کو سراہا۔
انہوں نے تمام مسائل کو بات چیت کے ذریعے حل کرنے کے لیے پاکستان کے عزم کا بھی اظہار کیا، وزیراعظم نے 2022 کے تباہ کن سیلاب کے دوران عالمی بینک کی بروقت اور فراخدلانہ مدد پر شکریہ ادا کیا جس نے پاکستان کو فوری امدادی سرگرمیاں اور تعمیر نو اور بحالی کے اقدامات شروع کرنے میں مدد کی۔
عثمان ڈیون نے پاکستان کے دورے کے دوران پر تپاک مہمان نوازی پر وزیر اعظم شہباز شریف کا شکریہ ادا کیا۔
انہوں نے پاکستان کی دیرینہ شراکت داری اور معیشت کے اہم شعبوں میں تعاون کو مزید وسعت دینے کے لیے عالمی بینک کے عزم کا اعادہ کیا۔
ورلڈ بینک کے ریجنل نائب صدر نے پاکستان کی جاری میکرو اکنامک بحالی کو سراہتے ہوئے ملک کو مالیاتی استحکام اور پائیدار ترقی کی طرف لے جانے پر وزیر اعظم شہباز شریف کی حکومت کی تعریف کی، انہوں نے موجودہ انتظامیہ کے اصلاحاتی ایجنڈے کو بھی بالخصوص سراہا۔
عثمان ڈیون نے وزیر اعظم شہباز شریف کی مضبوط قیادت کو ادارہ جاتی اصلاحات آگے بڑھانے، سرمایہ کاروں کا اعتماد بحال کرنے اور جامع اقتصادی ترقی کو فروغ دینے کے لیے اہم قرار دیا۔
ملاقات میں حکومت پاکستان اور عالمی بینک کی جانب سے طویل المدتی ترقیاتی اہداف کے حصول اور پاکستان کے عوام کے خوشحال مستقبل کی تعمیر کے لیے آئندہ سالوں میں تعاون کو مزید مضبوط بنانے کے لیے مشترکہ عزم کا اظہار کیا گیا
