منتخب میڈیا اداروں پر پابندیاں سخت کردی گئیں، انسانی حقوق کمیشن کی اظہار رائے کی صورتحال پر رپورٹ
رپورٹ میں کہا گیا ہے کہ جمہوری معاشرے کی بقا کا انحصار شہریوں کی آزادانہ طور پر بولنے کی صلاحیت پر ہوگا
انسانی حقوق کمیشن پاکستان (ایچ آر سی پی) نے ملک میں گزشتہ 2 سال کے دوران اظہار رائے کی آزادی کی صورتحال پر اپنی رپورٹ جاری کردی، جس میں منتخب میڈیا اداروں پر پابندیاں سخت کرنے کی نشاندہی کی گئی ہے۔

ڈان اخبار کی رپورٹ کے مطابق صحافی ماہم مہر کی تحقیق اور تحریر کردہ اس رپورٹ میں اپریل 2022 میں سابق وزیر اعظم عمران خان کے خلاف عدم اعتماد کے ووٹ کے بعد سے آزادی اظہار کی بگڑتی ہوئی صورتحال کا تفصیلی جائزہ پیش کیا گیا ہے۔

ایچ آر سی پی کی رپورٹ میں نئے میدان جنگ کی نشاندہی کی گئی ہے، جس میں بتایا گیا ہے کہ میڈیا کے کچھ حصوں پر پابندیاں سخت کی گئی ہیں اور دوسروں کے لیے پہلے سے سخت پابندیاں عائد ہیں۔

رپورٹ میں کہا گیا ہے کہ ایک صحافی کے قتل اور دوسروں کی جبری گمشدگی سے لے کر سرد مہری، سوچے سمجھے ’پریس ایڈوائس‘ اور ڈیجیٹل آزادیوں کو کنٹرول کرنے کے لیے قانونی تبدیلیوں کی بھرمار پر کوئی شک و شبہ نہیں ہے۔

رپورٹ میں کہا گیا ہے کہ اگرچہ ریاست سنسرشپ کی سطح میں اضافہ کر رہی ہے، لیکن ڈیجیٹل شعبے میں اظہار رائے کے لیے نئی جگہیں ابھر رہی ہیں، اس کے ساتھ ساتھ روایتی میڈیا پر اعتماد میں کمی کا فائدہ بڑے کاروباری اداروں، انتہائی دائیں بازو اور اسٹیبلشمنٹ نے اٹھایا ہے۔

رپورٹ میں کہا گیا ہے کہ سنسرشپ کا سب سے اہم نتیجہ اس مسئلے پر بڑھتی ہوئی قومی گفتگو ہے، جو عوام کی آزادانہ طور پر بات کرنے کی مستقل خواہش کا ثبوت ہے۔

’سخت سزا‘ کے عنوان سے شائع ہونے والی اس رپورٹ میں ایک ایسے ملک کی خوفناک تصویر پیش کی گئی ہے، جہاں قانونی، ادارہ جاتی اور خفیہ دباؤ کی وجہ سے اظہار رائے کی آزادی کو دبایا جا رہا ہے۔

عمران خان کی برطرفی سے اختلاف رائے کے خلاف کریک ڈاؤن کا آغاز ہوا، جس میں بڑے پیمانے پر گرفتاریاں، جبری گمشدگیاں اور ٹارگٹڈ سنسرشپ شامل ہیں، ان اقدامات نے ایک ایسا ماحول پیدا کیا ہے، جہاں میڈیا کے منظر نامے پر خوف اور جبر کا غلبہ ہے۔

رپورٹ میں کہا گیا ہے کہ سب سے خطرناک نتائج میں سے ایک ’سافٹ ویئر اپ ڈیٹس‘ کا عروج ہے، جو صحافیوں اور کارکنوں کے اغوا، پوچھ گچھ اور جبری تعمیل کے لیے استعمال ہونے والا لفظ ہے۔

رپورٹ میں کہا گیا ہے کہ ان ’اپ ڈیٹس‘ کے نتیجے میں اکثر جبری اعترافات کیے جاتے ہیں، اور میڈیا پروفیشنلز کو ان کے کردار سے دور رکھا جاتا ہے، جس کی وجہ سے وہ آزادانہ طور پر اپنا کام جاری رکھنے سے قاصر رہتے ہیں۔

2024 کے عام انتخابات سے قبل میڈیا کوریج کو غیر معمولی پابندیوں کا سامنا کرنا پڑا تھا۔

ایچ آر سی پی کے مطابق صحافیوں کو واضح طور پر ہدایت کی گئی تھی کہ وہ عمران خان یا ان کی جماعت پاکستان تحریک انصاف (پی ٹی آئی) کا نام لینے سے گریز کریں، نیوز روم کے ایک ملازم نے 3 منٹ تک جاری رہنے والی ایک ملاقات کا ذکر کیا، جس میں ریاستی نمائندوں نے حکم دیا کہ ’عمران خان کا نام آن ایئر نہیں کیا جائے گا‘۔

سوشل میڈیا، جو اختلاف رائے کا ایک پلیٹ فارم ہے، ریاست کی طرف سے جبر اور قانونی ترامیم کا نشانہ بھی بن گیا، جیسے پاکستان الیکٹرانک کرائمز ایکٹ (پیکا) میں کی گئی ترامیم، جس نے کارکنوں اور ڈیجیٹل اثر و رسوخ رکھنے والوں کی نگرانی اور جانچ پڑتال میں اضافہ کیا، جس سے تنقیدی آوازوں کو مؤثر طریقے سے خاموش کیا گیا۔

2022 میں کینیا میں نجی ٹی وی چینل اے آر وائی کے صحافی ارشد شریف کا قتل ایک اہم موڑ بن گیا تھا، نیوز رومز خوف کی لپیٹ میں تھے اور صحافی خود کو نشانہ بننے سے بچنے کے لیے سیلف سنسرشپ کا سہارا لے رہے تھے۔

ایک ساتھی نے خوف کے ماحول کو اجاگر کرتے ہوئے بتایا کہ ارشد کی لاش کو دیکھ کر یہ ’بہت حقیقی‘ لگنے لگا تھا۔

رپورٹ میں پاکستان میں سینسرشپ کی متضاد نوعیت کو اجاگر کیا گیا، اور بہت سی آوازوں کو خاموش کرا دیا گیا، ریاستی مفادات سے وابستہ افراد کو آزادانہ طور پر اجازت دی گئی۔ یہ دوہرا پن ایک ’سلیکٹڈ کریک ڈاؤن‘ کی عکاسی کرتا ہے، جہاں میڈیا کی آزادی مخالفین کے لیے ہوتی ہے، لیکن اتحادیوں کے لیے وسیع ہوتی ہے۔

جابرانہ ماحول کے باوجود، ایچ آر سی پی امید کی کرن کو نوٹ کرتا ہے، سوشل میڈیا کی اگرچہ بہت زیادہ نگرانی کی جاتی ہے، تاہم یہ مزاحمت کے لیے ایک ’جگہ‘ کے طور پر کام کرتا ہے، سینسرشپ کے خلاف عوامی رد عمل میں اضافہ ہو رہا ہے، شہریوں نے شفافیت اور احتساب کا مطالبہ کیا ہے۔

رپورٹ میں نئے ڈیجیٹل پلیٹ فارمز کے ابھرنے کی بھی نشاندہی کی گئی ہے۔ جو روایتی میڈیا کو دبانے کے ممکنہ توازن کے طور پر ہیں۔

تاہم روایتی میڈیا میں اعتماد کی کمی کا فائدہ مختلف مفاداتی گروہوں بشمول بڑے کاروباری اداروں، انتہائی دائیں بازو اور اسٹیبلشمنٹ نے اپنے ایجنڈے کو آگے بڑھانے کے لیے اٹھایا ہے۔

ایچ آر سی پی نے متنبہ کیا کہ آوازوں کو منتخب طور پر خاموش کرنے سے نہ صرف جمہوریت کمزور ہوگی، بلکہ اداروں پر عوام کا اعتماد بھی ختم ہوجائے گا۔

رپورٹ میں اظہار رائے کی آزادی کے بنیادی حق کے تحفظ کے لیے فوری اقدامات کا مطالبہ کیا گیا ہے، اور اس بات پر زور دیا گیا ہے کہ ایک جمہوری معاشرے کی بقا کا انحصار اس کے شہریوں کی آزادانہ طور پر بولنے کی صلاحیت پر ہوگا