جولائی تا دسمبر 5 وسطی ایشیائی ممالک کو برآمدات میں 17 فیصد کمی

مالی سال 25-2024 کی پہلی ششماہی کے دوران وسطی ایشیا کے 5 ممالک کو پاکستانی برآمدات میں 17 فیصد کمی واقع ہوئی ہے۔

خطے میں ملکی برآمدات ابھی تک اپنی پوری صلاحیت حاصل نہیں کر سکی ہیں، اسی طرح قازقستان، تاجکستان اور ازبکستان سے پاکستان کو درآمدات میں نمایاں اضافہ ہوا ہے حالانکہ تجارتی خسارے کو متوازن کرنے کے لیے باقاعدگی سے ہائی پروفائل دورے کیے جاتے ہیں۔

جولائی تا دسمبر 25-2024 کے دوران پاکستان کی وسطی ایشیائی ممالک قازقستان، کرغزستان، تاجکستان، ترکمانستان اور ازبکستان کو برآمدات کی مالیت 17.02 فیصد کم ہو کر 9 کروڑ 84 لاکھ ڈالر رہیں جو گزشتہ سال کے اسی عرصے میں 10 کروڑ 94 لاکھ 79 ہزار ڈالر تھیں۔

مالی سال 2025 کے چھٹے ماہ کے دوران خطے سے درآمدات 89 لاکھ 10 ہزار ڈالر اضافے کے ساتھ 13 کروڑ 66 لاکھ 40 ہزار ڈالر تک پہنچ گئیں جو گزشتہ سال کے اسی عرصے میں 12 کروڑ 77 لاکھ 3 ہزار ڈالر تھیں، ان میں سے زیادہ تر درآمدات تاجکستان، ازبکستان اور ترکمانستان سے آئی تھیں۔

وسطی ایشیائی ممالک کے ساتھ پاکستان کی براستہ افغانستان تجارت سالانہ 40 سے 50 کروڑ ڈالر کے درمیان ہے، ازبکستان پہلے ہی پاکستان کے ساتھ ٹرانزٹ ٹریڈ معاہدے پر عمل درآمد کر چکا ہے، معاہدے کے تحت ازبکستان نے ٹرانزٹ معاہدے کے تحت بھی سامان درآمد کرنا شروع کر دیا ہے۔

گزشتہ سال تاجکستان نے ٹرانزٹ معاہدے کے تحت پاکستان سے آلو سے لدے 3 ٹرک درآمد کیے تھے۔

مالی سال 2025 کے چھ ماہ میں ترکمانستان کو پاکستان کی برآمدات 9 لاکھ 50 ہزار ڈالر رہیں جو گزشتہ سال کے اسی مہینے کے مقابلے میں 5 لاکھ 90 ہزار ڈالر تھیں جو 61 فیصد اضافے کو ظاہر کرتی ہیں، ترکمانستان سے درآمدات 98 فیصد اضافے کے ساتھ 54 لاکھ 90 ہزار ڈالر رہیں جو گزشتہ سال کے اسی عرصے میں 27 لاکھ 70 ہزار ڈالر تھیں۔

مالی سال 2025 کے 6 ماہ میں ازبکستان کو برآمدات 2 کروڑ 80 لاکھ 4 ہزار ڈالر تک پہنچ گئیں جو گزشتہ سال کے اسی عرصے کے مقابلے میں 3 کروڑ 48 لاکھ 60 ہزار ڈالر تھیں جو 19.56 فیصد کی کمی کو ظاہر کرتی ہیں، ازبکستان سے درآمدات 4کروڑ 38لاکھ10 ہزار ڈالر اضافے سے 4کروڑ 79لاکھ 90 ہزار ڈالر تک پہنچ گئیں جو گزشتہ سال کے اسی عرصے میں 41لاکھ80 ملین ڈالر تھیں۔

قازقستان کی برآمدی مالیت سب سے زیادہ ہے جس نے مالی سال 2025 کے 6 ماہ میں 3کروڑ 94لاکھ 30 ہزار ڈالر کی برآمدات کیں جو گزشتہ سال کے اسی عرصے کے دوران 5کروڑ 65لاکھ 90 ہزار ڈالر کے مقابلے میں 30.32 فیصد کمی کو ظاہر کرتی ہے۔

قازقستان سے درآمدات کی مالیت 72.76 ملین ڈالر رہی جو گزشتہ سال کے اسی مہینے میں 0.385 ملین ڈالر تھی۔

مالی سال 2025 کے 6 ماہ میں کرغزستان کو پاکستان کی برآمدات 21 لاکھ 80 ہزار ملین ڈالر رہیں جو گزشتہ سال کے اسی عرصے میں 48 لاکھ 10 ہزار ڈالر تھیں جو 54.67 فیصد کمی کو ظاہر کرتی ہیں، کرغزستان سے درآمدات ایک لاکھ 40 ہزار ڈالر کے مقابلے میں 3 لاکھ ڈالر رہیں۔

مالی سال 2025 کے 6 ماہ میں تاجکستان کو برآمدات 2 کروڑ 24 لاکھ ڈالر رہیں جو گزشتہ سال کے اسی عرصے میں ایک کروڑ 26 لاکھ 20 ہزار ڈالر تھیں جو 60 فیصد اضافے کو ظاہر کرتی ہیں۔

تاجکستان سے درآمدات کا حجم ایک کروڑ 10 لاکھ ڈالر رہا جو گزشتہ سال کے اسی عرصے میں 14 لاکھ 30 ہزار ڈالر تھا جو 86 لاکھ 70 ہزار ڈالر کا اضافہ ظاہر کرتا ہے