سکر : (ویب ڈیسک ) جنوبی امریکا کے ملک بولیویا میں حکومت کا تختہ اُلٹنے کی سازش اور فوجی بغاوت کو ناکام بنادیا گیا۔
میڈیا رپورٹس کے مطابق جنوبی امریکی ملک بولیویا میں فوج نے صدارتی محل سمیت متعدد سرکاری عمارتوں پر دھاوا بول دیا، منتخب حکومت کا تختہ الٹنے کی کوشش کے دوران درجنوں فوجی گاڑیاں صدارتی محل کے عمارت سے ٹکرادی گئیں۔
صدارتی محل کی حفاظت پر مامور اہلکاروں نے فوجی گاڑیوں کے ذریعے صدارتی محل کے محاصرے کی کوشش ناکام بناتے ہوئے کئی فوجیوں کو گرفتار کرلیا اور بعد میں تمام گاڑیاں وہاں سے ہٹادی گئیں۔
فوجی بغاوت ناکام بنائے جانے کے بعد بولیویا کی فوج کے جنرل جوآن ہوزے زُونیگا کو گرفتار کرلیا گیا ہے۔
بولیویا کے صدر لوئی آرک نے فوج کے نئے سربراہ کا تقرر کیا ہے جنہوں نے تمام فوجیوں کو حکم دیا کہ منتخب حکومت اور ریاستی اداروں کے خلاف ہتھیار نہ اٹھائے جائیں۔
جس کے بعد اپنے سربراہ کا حکم ملتے ہی فوجیوں نے اپنی بیرکس میں واپس جانا شروع کیا اور صدر آرک کے ہزاروں حامی صدارتی محل کے سامنے چوک میں جمع ہوگئے، جنہوں نے بولیویا کے پرچم اٹھائے ہوئے تھے۔
جنوبی امریکا کے ملک بولیویا کے صدر لوئی آرک نے منتخب حکومت کا تختہ الٹنے کی سازش اور فوجی بغاوت کو ناکام بنانے پر عوام کا شکریہ ادا کرتے ہوئے کہا کہ وہ آئندہ بھی منتخب حکومت کا تختہ الٹنے کی ہر کوشش کے سامنے مزاحم ہوں گے اور عوام سے مدد طلب کریں گے۔
دوسری جانب یورپی یونین کے اعلیٰ سفارت کار جوسیپ بوریل بغاوت کی کوشش کی مذمت کرنے والے اولین غیر ملکی رہنماؤں میں شامل ہیں۔