اشمت پٹیل سے صرف دوستی تھی، تعلقات کے دعوے غلط ہیں، وینا ملک

اداکارہ و ٹی وی میزبان وینا ملک نے واضح کیا ہے کہ ان کی بھارتی اداکار اور ماڈل اشمت پٹیل سے صرف دوستی تھی، ان کے درمیان تعلقات کی خبریں غلط تھیں، جنہیں جان بوجھ کر پھیلایا گیا۔

وینا ملک نے حال ہی میں ’سنو ٹی وی‘ کے پروگرام میں شرکت کی، جہاں انہوں نے کیریئر سمیت مختلف معاملات پر کھل کر بات کی۔

اداکارہ کا کہنا تھا کہ اگر انہیں مرد بن کر پیدا ہونے کا موقع دیا جاتا تو وہ چاہت فتح علی خان بن کر پیدا ہوتیں، کیوں کہ ان کا ہر گایا گانا مقبول ہوجاتا، وہ خود ہی مشہور ہوجاتیں۔

ایک اور سوال کے جواب میں انہوں نے بولی وڈ کے تینوں خانز کے ساتھ کام کرنے کی خواہش ظاہر کی، تاہم کہا کہ انہیں زیادہ خواہش شاہ رخ خان کے ساتھ کام کرنے کی ہے۔

وینا ملک کا کہنا تھا کہ کوئی اداکارہ پاگل ہی ہوگی جو بولی وڈ کے تینوں خانز یعنی سلمان، شاہ رخ اور عامر خان کے ساتھ کام نہیں کرنا چاہیں گی۔

اداکارہ نے پروگرام میں بات کرتے ہوئے اپنے تنازعات اور اسکینڈلز کے حوالے سے کہا کہ ان کے حوالے سے زیادہ تر خبریں جھوٹی پھیلائی گئیں، انہیں اسکینڈل کوئین قرار دیا گیا۔

وینا ملک کے مطابق اگر دنیا میں کہیں کوئی ’اسکینڈلز اور تنازعات‘ کا ایوارڈ دیتا تو انہیں سب سے بڑا ایوارڈ ملتا، کیوں کہ ان کے حوالے سے ان کے نظر نہ آنے والے دشمنوں نے اتنی زیادہ منفی خبریں پھیلا رکھی تھیں۔

بولی وڈ میں کام کرنے کے حوالے سے بات کرتے ہوئے ان کا کہنا تھا کہ ’بگ باس‘ میں کام کرنے کے بعد انہیں وہاں متعدد منصوبوں میں کام کی پیش کش ہوئی جب کہ بعد میں بھی بگ باس میں انہیں شرکت کرنے کے لیے کہا جاتا رہا۔

ان کا کہنا تھا کہ ’بگ باس‘ میں کام کرنے کے دوران ہی ان کی دوستی اشمت پٹیل سے ہوگئی تھی اور وہ ہی ان کے سب سے اچھے بھارتی دوست تھے۔

انہوں نے اعتراف کیا کہ انہوں نے اور اشمت پٹیل نے لوگوں کے سامنے چند ملاقاتیں کیں لیکن ان کی تنہائی میں ملاقاتوں کے دعووں میں کوئی سچائی نہیں۔

وینا ملک نے دعویٰ کیا کہ ان کے اور اشمت پٹیل کے تلعقات کے حوالے سے پھیلائی گئی خبریں جھوٹی تھیں، ان کے درمیان ایسا کچھ بھی نہیں تھا، صرف دوستی تھی۔

اداکارہ نے بتایا کہ بعد ازاں اشمت پٹیل کی ایک غلطی کی وجہ سے ان کے درمیان دوستی ختم ہوگئی اور پھر انہوں نے واپس کبھی بھارتی اداکار سے رابطہ نہیں کیا۔

خیال رہے کہ وینا ملک 2012 اور 2013 میں بھارت ’بگ باس‘ میں شرکت کے لیے گئی تھیں، جس کے بعد وہ بولی وڈ فلموں میں بھی دکھائی دیں۔

اسی دوران ان کی اشمت پٹیل سے دوستی، تعلقات اور محبت کی چہ مگوئیاں بھی ہوتی رہیں