غزہ: اسرائیل کی 7 اکتوبر سے جاری بربریت کے نتیجے میں شہید ہونے والے فلسطینیوں کی تعداد 35 زائد سے تجاوز کر گئی۔
غزہ کی وزارت صحت نے ایک بیان میں کہا ہے کہ حماس اسرائیل جنگ کے 7 ماہ سے زائد عرصے میں غزہ میں کم از کم 35,709 فلسطینی جاں بحق ہو چکے ہیں، شہید ہونے والوں میں زیادہ تر تعداد خواتین اور بچوں کی ہے، حملوں میں 79,990 افراد زخمی ہوئے ہیں۔
دوسری جانب اسرائیل کی غزہ اور رفح میں شدید بمباری جاری ہے، گزشتہ 24 گھنٹوں کے دوران خواتین اور بچوں سمیت مزید 62 فلسطینی شہید جبکہ 138 شدید زخمی ہو گئے ہیں، زخمیوں میں متعدد کی حالت تشویشناک ہے، اسرائیلی حملوں سے کئی پناہ گاہیں بھی زمین بوس ہو گئیں۔
واضح رہے کہ گزشتہ روز تین یورپی ملکوں آئرلینڈ، سپین اور ناروے کی قیادت نے فلسطین کی ریاست کو تسلیم کرنے کا اعلان کیا ہے، یہ اعلان پچھلے کئی ہفتوں سے کیے جانے کا امکان ظاہر کیا جا رہا تھا مگر اب یہ بدھ کو زیادہ ٹھوس، موثر اور جاندار طریقے سے سامنے آیا ہے۔
سپین کے وزیر اعظم پیڈرو سانچیز کی طرف سے یہ اعلان کیا گیا کہ 28 مئی کو آزاد فلسطینی ریاست کو تسلیم کرنے کا ارادہ رکھتے ہیں، ناروے کے وزیر اعظم نے کہا کہ ہمارا ملک فلسطین کو باضابطہ طور پر 28 مئی سے ایک ریاست کے طور پر تسلیم کر لے گا۔
آئرلینڈ کے وزیر اعظم سائمن ہیرس نے کہا ہے کہ ہم اوسلو اور میڈرڈ کے ساتھ مشترکہ اعلامیہ میں فلسطینی ریاست کو تسلیم کرتے ہیں، یہ آئرلینڈ اور فلسطین کیلئے ایک تاریخی اور اہم دن ہے، ہمیں یقین ہے کہ مزید ملک بھی اس سلسلے میں ہمارے ہمقدم بنیں گے۔
دوسری جانب کولمبیا نے بھی فلسطین کو باقاعدہ طور پر آزاد ریاست تسلیم کرنے کے بعد رملہ، فلسطین میں سفارتخانہ کھولنے کا اعلان کر دیا ہے۔
کولمبین صدر نے میڈیا سے گفتگو کرتے ہوئے کہا ہے کہ اسرائیلی وزیر اعظم نیتن یاہو نے غزہ میں شہریوں کا قتل عام کیا، کولمبیا نے اسرائیلی بربریت کی وجہ سے اسرائیل میں اپنا سفارتخانہ بند کیا، آئندہ ماہ رملہ میں کولمبیا کا سفارتخانہ کھل جائے گا۔