ڈاکٹر ثمن علیم
کہتے ہیں انسان جو بھی محنت کرتا اور پیسہ کماتا ہے وہ خود کو سکون دینے یا آرام پہنچانے کے لئے ہوتا ہے۔کوئی کام ہم اپنے شوق کے لئے بھی کر رہے ہوں تو در حقیقت اس کا مقصد بھی اپنی ذات کو تسکین پہنچانا ہی ہوتا ہے۔اسی طرح وہ لوگ جو اپنی زندگی کو بہتر انداز میں گزارنے کے لئے دن رات محنت کرتے اور گھنٹوں نوکریاں کرتے ہیں انہیں کام سے فراغت کے بعد سکون چاہیے ہوتا ہے۔
اپنے اندر اگلے دن کام کرنے کی خاطر توانائی جمع کرنے کے لئے بھی آرام کس قدر ضروری ہے۔اس سے ہم سب بخوبی واقف ہیں اور اگر آپ سے پوچھا جائے کہ جسم کی تھکاوٹ دور کرنے اور اسے پھر سے کام کرکے قابل بنانے کے لئے کیا چیز سب سے اہم ہے تو یقینا آپ کا جواب ہو گا بہترین خوراک اور بھرپور نیند۔

دنیا کی کوئی بھی چیز اور مہنگی سے مہنگی دوا بھی آپ کے جسم کو وہ توانائی نہیں بخش سکتی جو آٹھ سے نو گھنٹے کی بھرپور نیند لینے سے حاصل ہوتی ہے۔

ایسے میں کیا ہو اگر آپ شدید تھکاوٹ کے باوجود سو نہ پائیں،یا دن بھر کام کرنے کے بعد بھی بستر پر لیٹ کے نیند آپ کی آنکھوں سے کوسوں دور ہو؟یقینا آپ کوفت کا شکار ہوں گے اور اگلے دن خود کو جسمانی اور ذہنی طور پر بھی تھکا ہوا محسوس کریں گے۔اب سوال یہ پیدا ہوتا ہے کہ کیا ایسا ممکن ہے کہ انسان دن بھر کام کرنے کے باوجود رات کو سو نہ پائے؟تو جواب ہو گا جی ہاں!ایسا سو فیصد ممکن ہے۔
انجانے میں ہم دن بھر کئی ایسے کام کر جاتے ہیں جو ہماری نیند کو شدید متاثر کرنے کا باعث بنتے ہیں۔وہ کون سے کام ہیں؟آئیے ان کے بارے میں آپ کو قدرے تفصیل سے بتاتے ہیں۔
مناسب خوراک نہ لینا:۔
غذا کی اہمیت سے کسی صورت انکار نہیں کیا جا سکتا۔اگر آپ دن بھر کام میں مصروف رہنے کے باعث ٹھیک سے کھا پی نہیں سکے تو ایسا ممکن ہے کہ آپ تھکاوٹ محسوس کرنے کے باوجود سو نہ پائیں۔
چاہے کتنی ہی مصروفیت کیوں نہ ہو بھرپور ناشتہ،دوپہر کا کھانا اور رات کو کوئی ہلکی پھلکی چیز اپنی خوراک میں ضرور شامل کریں۔پیٹ بھرا ہو گا تو آپ کو نیند بھی بہترین آئے گی۔
ورزش نہ کرنا:۔
اکثر لوگ خیال کرتے ہیں کہ دن بھر کام کرنے کے بعد بھلا ورزش کی کیا ضرورت ہے۔اس کی مثال کچھ ایسی ہی ہے جیسے آپ کے کچن میں پکانے کے لئے ہر چیز موجود ہو لیکن آپ کہیں کہ سب تو گھر میں موجود ہے پھر بھلا پیٹ بھرنے کے لئے پکا کر کھانے کی کیا ضرورت ہے۔
کبھی اُٹھ کر،بیٹھ کے اور چلتے پھرتے کام کرتے رہنا ورزش نہیں ہے،بلکہ اس سے آپ کا جسم مسلسل مصروف رہنے کے باعث تھکن کا شکار ہونے لگتا ہے اور پندرہ سے بیس منٹ کے لئے پٹھوں میں کھنچاؤ پیدا کرنا نہ صرف ان کی تھکاوٹ دور کرتا ہے بلکہ آپ ذہنی طور پر بھی خود کو پُرسکون محسوس کرتے ہیں۔ورزش سے آپ کے جسم سے تھکن نکل جاتی ہے اور بھرپور نیند آتی ہے جبکہ ورزش نہ کرنے کی صورت میں تھکن پٹھوں میں پھنسی رہتی ہے اور آپ پوری رات بے چین رہتے ہیں۔

دوائیوں کا استعمال:۔
ہمارے ہاں کسی بھی بیماری کی صورت میں لوگ سب سے پہلے فوراً ڈاکٹر کے پاس بھاگتے ہیں اور پھر ان کا خیال ہوتا ہے کہ دواؤں کا پورا تھیلا کھانے سے وہ صحت یاب ہو جائیں گے۔یہ لوگ نہیں جانتے کہ آج کل کی دوائیں جسم سے ایک بیماری دور کرکے کئی نئی بیماریاں پیدا کر دیتی ہیں،لہٰذا کوشش کریں کہ دواؤں کا استعمال کم سے کم کریں اور بیماری کا علاج قوت مدافعت،غذا،بھرپور نیند اور ورزش سے کریں۔ضرورت سے زیادہ دواؤں کا استعمال آپ کی نیند بھی متاثر کر سکتا ہے۔