راولپنڈی: وفاقی وزیر ریلوے شیخ رشید نے کہا کہ پاکستان اور بھارت کے مابین اکتوبر اور نومبر میں جنگ ہوتی دیکھ رہا ہوں۔ ان خیالات کا اظہار وفاقی وزیر ریلوے شیخ رشید نے پنجاب گروپ آف کالجز کے زیر اہتمام یوم اظہار یکجہتی کشمیر کی تقریب سے خطاب کرتے ہوئے کیا۔ شیخ رشید کا کہنا تھا کہ کشمیر کی آخری جدوجہد کا وقت آگیا، اب جنگ ہوئی تو آخری ہوگی۔
ہماری افواج نے 72 سال سے جو تیاریاں کی ہیں اس کے فائنل راٰؤند کا وقت آن پہنچا ہے، فاشسٹ مودی کے راستے کی رکاوٹ پاکستان ہے۔ پچھلے 23 دنوں سے سفاک مودی نے دنیا میں عجیب سماں بنا دیا ہے، کشمیر کی پرفضا وادیاں آگ اور خون کی وادیوں میں بدل سکتی ہیں۔ پاکستان اور بھارت کے درمیان دس جنگیں ہوچکی ہیں یا ان کے قریب سے لوٹے ہیں۔

انہوں نے کہا کہ میں قوم کوجنگ کے لیے تیار کرنے کےلیے نکلا ہوں، ہمیں کشمیریوں کا ساتھ دینا ہے ورنہ تاریخ ہمیں معاف نہیں کرے گی اور قائد اعظم کا خواب پورا نہیں ہوگا۔

اُن کا کہنا تھا کہ ہمارے دفاعی اقتصادی مسائل ہیں لیکن 130 ملین ایسے جوان ہیں جو پاکستان اور اسلام پر مرتے ہیں۔ اقوام متحدہ اور سلامتی کونسل مسئلہ کشمیر حل نہیں کر رہے، سلامتی کونسل مسئلہ حل کرنا چاہتی تو رائے شماری ہوچکی ہوتی۔ اقوام متحدہ نے مسائل کو کبھی حل نہیں کیا، سیاستدان وہ ہوتا ہے جو مستقبل کو جانتا ہے، یہ گھی سیدھہ انگلی سے نہیں نکلے گا۔
کشمیریوں کی آواز کے ساتھ آواز ملا کر کھڑا ہونا ہے۔ 10 محرم کے بعد دوبارہ کشمیر آؤں گا، فاشسٹ مودی کی راہ میں صرف پاکستان رکاوٹ ہے۔ شیخ رشید کا کہنا تھا کہ قائداعظم نے مسلم دشمن سوچ کا پہلے ہی اندازہ لگا لیا تھا، خونخوار مودی کی وجہ سے کشمیر سے بارود کی بو آرہی ہے، جو سوچتے ہیں کہ اب بھی مذاکرات کی گنجائش ہے وہ بے وقوف ہیں، چاہ بہار جانے کے لیے گوادر اس کے راستے میں حائل ہے، خوش قسمتی ہے کہ ہمارے ساتھ چین جیسا دوست کھڑا ہے۔ کل بھی چین کے جنرل کی جنرل باجوہ سے ملاقات ہوئی، ساری دنیا ہمارے ساتھ ہے لیکن پیٹرول پمپ والے ہمارے ساتھ نہیں۔ انہوں نے مزید کہا کہ 27 سمتبر کو عمران خان کی اقوام متحدہ میں تقریر اہمیت رکھتی ہے۔