لاہور: پی ٹی آئی حکومت میں ایک اور استعفیٰ سامنے آ گیا۔چیئرمین وزیراعلی پنجاب شکایت سیل ملک اسد کھوکھر مستعفی ہوگئے ہیں۔بتایا گیا ہے کہ رکن پنجاب اسمبلی ملک اسد کھوکھر نے چیئرمین وزیراعلیٰ پنجاب شکایت سیل سے استعفی ذاتی وجوہات کی بنا پر دیا۔اپنے استعفے میں انہوں نے لکھا ہے کہ وہ بطور چیئرمین شکایت سیل اپنے حلقے میں وقت نہیں دے پا رہے ہیں۔
اس لیے وہ اپنے عہدے سے مستعفی ہو رہے ہیں۔واضح رہے کہ اس سے قبل چیئرمین پنجاب ٹیکنیکل اینڈ ووکیشنل ٹریننگ انسٹی ٹیوٹ (ٹیوٹا) حافظ فرحت عباس نے عہدے سے استعفیٰ دیدیا ، ذرائع کے مطابق چیئر مین ٹیوٹا نے کام میں مداخلت کے باعث استعفیٰ دیا ۔ چیئرمین ٹیوٹا حافظ فرحت عباس نے عہدے سے اپنا تحریری استعفیٰ وزیر اعلیٰ پنجاب سردار عثمان بزدار کو ارسال کیا تھا ۔