بلوچستان میں پسند کی شادی پر جوڑے کا قتل، شوبز شخصیات کا اظہار افسوس

بلوچستان میں پسند کی شادی کرنے والے جوڑے کے سفاکانہ قتل کی ویڈیو سامنے آنے کے بعد شوبز سے وابستہ شخصیات نے واقعے پر گہرے دکھ اور افسوس کا اظہار کیا ہے۔

گزشتہ روز سوشل میڈیا پر ایک ویڈیو وائرل ہوئی، جس میں چند افراد کو ایک خاتون اور مرد کو قتل کرتے ہوئے دیکھا جا سکتا ہے، جن پر بظاہر محبت کی شادی کرنے کا الزام تھا۔

یہ واقعہ مبینہ طور پر عیدالاضحیٰ کے آس پاس پیش آیا اور اسے ’غیرت کے نام پر قتل‘ قرار دیا جا رہا ہے۔

قتل سے قبل مقتولہ نے قاتلوں سے براہوی زبان میں کہا کہ ’تمہیں مجھے گولی مارنے کی اجازت ہے، لیکن اس سے زیادہ کچھ نہیں‘، اس نے یہ بھی کہا کہ اسے سات قدم چلنے دیا جائے، جس کے بعد اسے مبینہ طور پر اس کے بھائی نے تین گولیاں مار کر قتل کیا اور پھر اس کے شوہر کو بھی قتل کر دیا گیا۔

اس افسوسناک واقعے پر مختلف شعبہ جات سے تعلق رکھنے والی شخصیات کی جانب سے افسوس کا اظہار کیا جا رہا ہے اور شوبز شخصیات بھی اس واقعے پر انتہائی افسردہ ہیں۔

اداکارہ حرا خان نے انسٹاگرام پر لکھا کہ امید ہے کہ جن لوگوں نے یہ قتل اپنی آنکھوں کے سامنے ہوتے دیکھا ہے، ان کے پاس خدا کے سامنے سوال و جواب کے وقت کے لیے جواب تیار ہوگا، خدا کرے کہ تم سب جہنم میں جاؤ۔

انہوں نے لکھا کہ وہ اب اچھی جگہ پر ہے اور ساتھ ہی اس لڑکی کی مغفرت کے لیے دعا بھی کی۔

اداکار اسامہ خان نے مذکورہ واقعے کی تصویر شیئر کرتے ہوئے لکھا کہ یہ کون سی مردانگی ہے، جس میں غیرت کے نام پر بیٹی کا قتل کر دیا جاتا ہے لیکن انہیں ان کا حق نہیں دیا جاتا۔

اداکار و میزبان مشی خان نے اس واقعے پر ایک ویڈیو انسٹاگرام پر شیئر کی، جس میں انہوں نے کہا کہ اتنا دلخراش واقعہ پیش آیا جس میں پسند کی شادی کرنے والے جوڑے کو نام نہاد مردوں نے قتل کر دیا، یہ کس جنگل میں رہ رہے ہیں، جہاں آئے روز ایسے دلخراش واقعات ہو رہے ہیں۔

ان کا کہنا تھا کہ اس کی ایک بہت بڑی وجہ یہ ہے کہ ہمارے ملک کا قانون درست نہیں، ہر ادارہ کرپشن میں ملوث ہے، کیا جرم تھا ان کا؟ صرف پسند کی شادی کرنے کی وجہ سے انہیں قتل کر دیا گیا۔

مشی خان نے مزید کہا کہ اس ملک میں جب حرام کام آزادانہ طور پر کیے جاتے ہیں، تو اس وقت کسی کی غیرت نہیں جاگتی، ساتھ ہی انہوں نے متاثرین کے لیے انصاف کا بھی مطالبہ کیا۔

سینئر اداکار نعمان اعجاز نے بھی اس واقعے پر افسوس کا اظہار کرتے ہوئے لکھا کہ خواتین کو تو جنگ میں مارنے کی بھی اجازت نہیں اور لوگ انہیں محبت کرنے کے جرم میں مار رہے ہیں