انڈونیشیا کے سیاحتی جزیرے بالی میں کشتی ڈوبنے سے 4 افراد ہلاک، 32 لاپتا ہوگئے

17 ہزار سے زائد جزائر پر مشتمل ملک انڈونیشیا میں کشتی کے حادثات عام ہیں
انڈونیشیا کے سیاحتی جزیرے بالی کے قریب ایک کشتی ڈوبنے کے بعد 32 افراد لاپتا ہوگئے، ریسکیو ورکرز نے اب تک 4 لاشیں نکال لی ہیں، صبح کے وقت موسم اور سمندر کی حالت بہتر ہونے سے زندہ بچ جانے والوں کی تلاش میں مدد ملی ہے۔

سی این این کی رپورٹ کے مطابق قومی ریسکیو ایجنسی کے مطابق اب تک 29 افراد کو بچا لیا گیا ہے، کشتی میں سوار اپنے پیاروں کی خیریت جاننے کے لیے ان کے اہل خانہ بندرگاہ پر پہنچے، جن میں سے بعض روتے ہوئے گھبراہٹ کے عالم میں یہ اُمید کر رہے تھے کہ ان کے عزیز بچ جانے والوں میں شامل ہوں گے۔

9 کشتیوں کے ذریعے مقامی ماہی گیر اور ساحلی علاقوں کے مکین مل کر لاپتا افراد کو تلاش کر رہے ہیں، 2 میٹر (6.5 فٹ) تک اونچی لہریں اور رات کا اندھیرا تلاش کے کام میں رکاوٹ بنے رہے، لیکن ایک ریسکیو اہلکار نے بتایا کہ صبح کے وقت موسم اور سمندر کی حالت بہتر ہونے سے لاپتا افراد کی تلاش میں آسانی ہوئی ہے۔

کے ایم پی تُنو پراتاما جایا نامی کشتی بدھ کی رات مشرقی جاوا کے قصبے بانیوانگی میں کتاپنگ بندرگاہ سے روانہ ہونے کے تقریباً آدھے گھنٹے بعد ڈوب گئی تھی، یہ کشتی بالی کی گلیمانک بندرگاہ جا رہی تھی جو تقریباً 50 کلومیٹر (30 میل) کا سفر ہے۔

قومی ریسکیو ایجنسی کے بیان کے مطابق کشتی میں 53 مسافر، 12 عملے کے ارکان اور 22 گاڑیاں (جن میں 14 ٹرک شامل تھے) موجود تھیں۔

کشتی کے ڈوبنے کا منظر بندرگاہ پر موجود ڈیوٹی افسر نے دیکھا اور فوری طور پر ریسکیو ٹیم کو اطلاع دی۔

سورابایا ریسکیو ایجنسی کے سربراہ ننانگ سگیت نے ایک بیان میں کہا کہ کشتی شروع سے ہی ریڈیو کے ذریعے رابطے میں نہیں تھی، بعد میں اسی کمپنی کے دوسرے جہازوں سے رابطہ ہوا، مگر اس وقت تک جہاز ایک طرف جھک چکا تھا۔

انہوں نے مزید کہا کہ آج کی تلاش کا مرکز سمندر پر ہے، ابتدائی متاثرین حادثے کی جگہ سے گلیمانک بندرگاہ کی طرف پانی میں پائے گئے۔

بانیوانگی کے پولیس چیف راما سمتاما پوترا کے مطابق بچائے گئے بہت سے افراد بے ہوش تھے، کیونکہ وہ کئی گھنٹے تک تیز لہروں والے پانی میں بہتے رہے۔

انڈونیشیا، جو کہ 17 ہزار سے زائد جزائر پر مشتمل ملک ہے، جہاں کشتی حادثات عام ہیں، کیونکہ یہاں کشتیوں کو آمد و رفت کے لیے بڑے پیمانے پر استعمال کیا جاتا ہے، اور اکثر حفاظتی ضوابط پر عملدرآمد میں کوتاہی کی جاتی ہے