وزیراعظم نے وسطی ایشیائی ریاستوں تک ریلوے نیٹ ورک کی توسیع کی منظوری دیدی

وزیر ریلوے نے بتایا کہ 17 ہزار 101 ملازمتیں ختم کی گئیں، 5 ہزار 695 کو مرحلہ وار ختم کیا جا رہا ہے
وزیراعظم شہباز شریف نے وسطی ایشیائی ممالک کے ساتھ تجارتی روابط کو فروغ دینے کے لیے ملک کے ریلوے نیٹ ورک کو وسعت دینے کی منظوری دیتے ہوئے اس ضمن میں کوششوں پر تیز کرنے پر زور دیا ہے۔
بدھ کے روز ریلوے سے متعلق اجلاس کے دوران وزیراعظم نے پاکستان ریلوے کو ہدایت کی کہ گوادر کو ریلوے نیٹ ورک سے منسلک کرنے کی کوششوں کو تیز کیا جائے۔

قبل ازیں، وزیر ریلوے حنیف عباسی نے ریلوے میں جاری اصلاحات پر وزیراعظم کو بریفنگ دیتے ہوئے بتایا کہ ریلوے کے شعبے میں مزید سرمایہ کاری کی بہت زیادہ گنجائش موجود ہے۔

انہوں نے بڑے ریلوے اسٹیشنوں پر جدید انفارمیشن ڈیسک کے قیام، لاہور، راولپنڈی اور ملتان اسٹیشنوں پر صفائی کے نظام کی آؤٹ سورسنگ، ٹرینوں اور اسٹیشنوں پر خوراک کے معیار کی نگرانی کے لیے صوبائی فوڈ اتھارٹیز کے ساتھ تعاون، اور طویل عرصے سے معطل سروسز کی بحالی جیسے اقدامات کا ذکر کیا۔

آؤٹ سورسنگ اور نیلامی
وزیر ریلوے نے بتایا کہ بولان میل کو روزانہ کی بنیاد پر دوبارہ چلایا گیا ہے، جب کہ ڈیرہ غازی خان ایکسپریس اور خوشحال خان خٹک ایکسپریس کو بھی بحال کیا جا چکا ہے۔

انہوں نے بتایا کہ سکھر، خانیوال، اور کوہاٹ میں کنکریٹ سلیپر فیکٹریاں، اور کراچی، لاہور، پشاور، کوئٹہ، ملتان، اور سکھر میں ریلوے کے اسپتال، اسکول، کالج، اور ریسٹ ہاؤسز آؤٹ سورس کیے جا رہے ہیں۔

اس کے علاوہ، رائل پام گالف اینڈ کنٹری کلب لاہور کی نیلامی کی جا رہی ہے, جہاں فائیو اسٹار ہوٹل کے قیام کی گنجائش موجود ہے, ریلوے کے آئی ٹی ڈائریکٹوریٹ کی ڈیجیٹائزیشن اور ری اسٹرکچرنگ کا عمل جاری ہے۔

انہوں نے بتایا کہ ٹرینوں پر مفت وائی فائی کی سہولت فراہم کی گئی ہے، رابطہ ایپ کو ٹکٹ بکنگ کے لیے اپ گریڈ کیا گیا ہے، 155 ریلوے اسٹیشنوں کو شمسی توانائی پر منتقل کیا گیا, جس سے لاکھوں روپے کی بچت ہوئی۔

وزیر ریلوے نے بتایا کہ 17 ہزار 101 ملازمتیں ختم کی گئیں، جب کہ مزید 5 ہزار 695 کو مرحلہ وار ختم کیا جا رہا ہے، اس کے علاوہ پاکستان ریلوے ایڈوائزری اور کنسلٹنسی سروسز، ریل کوپ، پاکستان ریلوے فریٹ ٹرانسپورٹ کمپنی اور پروجیکٹ امپلیمنٹیشن یونٹ کو بند کر دیا گیا ہے۔

وزیراعظم کو بتایا گیا کہ ریلوے کی 10 ارب روپے مالیت کی زمین واگزار کروائی گئی، اور لاہور-راولپنڈی ہائی اسپیڈ ٹرین، اسٹیشن اپ گریڈیشن، اور سب اربن سروسز پر پنجاب حکومت کے ساتھ منصوبہ بندی جاری ہے۔

مزید برآں، سریاب-کچلاک اور کوئٹہ-چمن سیکشنز کو اپ گریڈ کیا جائے گا۔

بیلاروس کے وفد سے ملاقات

وزیراعظم شہباز شریف نے بیلاروس کے وزیر دفاع لیفٹیننٹ جنرل وکٹر خرینن کی سربراہی میں ایک وفد سے بھی ملاقات کی، انہوں نے کہا کہ پاکستان بیلاروس کے ساتھ اقتصادی شراکت داری کو مضبوط کرنا چاہتا ہے، اور زرعی مشینری کی تیاری میں بیلاروس کے تجربے سے فائدہ اٹھانے کا خواہاں ہے۔

7 رکنی وفد میں بیلاروس کے سفیر آندرے میٹیلیسا، بیلاروس کی فضائیہ اور فضائی دفاع کے کمانڈر، اور بیلاروس کی وزارت دفاع کے اہلکار شامل تھے۔

وزیراعظم نے کہا کہ بیلاروس کے ساتھ آئی ٹی اور دفاعی شعبوں میں تعاون کو مزید فروغ دیا جائے گا۔

وزیراعظم شہباز شریف آج (جمعرات) کو سعودی عرب کے سرکاری دورے پر روانہ ہوں گے