مصر: اپوزیشن رہنما ہشام قاسم کو سابق وزیر کی ہتک عزت کے الزام میں دوبارہ 6 ماہ قید کی سزا

مصر کی حکومت نے اپوزیشن رہنما ہشام قاسم کو ایک سابق وزیر کی ہتک عزت کے جرم میں 6 ماہ کی نئی قید کی سزا سنادی۔

عالمی خبر رساں ادارے اے ایف پی کی رپورٹ کے مطابق اپوزیشن رہنما اور سابق صدارتی امیدوار ہشام قاسم کے وکیل نے بتایا کہ ان کے موکل کو ایک سابق وزیر کی ہتک عزت کے جرم میں 6 ماہ قید کی نئی سزا سنائی گئی ہے۔

ہشام قاسم کو فروری 2024 میں 6 ماہ کی سزا مکمل کرنے کے بعد رہا کر دیا گیا تھا، تاہم سزا کے باعث وہ دسمبر 2023 کے صدارتی انتخابات میں حصہ لینے سے عملاً محروم ہو گئے تھے۔

ہشام قاسم کے وکیل ناصر امین نے اے ایف پی کو بتایا کہ نئی سزا بدھ کے روز ان کے موکل کی غیر حاضری میں سنائی گئی کیونکہ ہشام قاسم ملک سے باہر ہیں۔

ناصر امین نے کہا کہ ہشام قاسم کو ان کے خلاف نئے الزامات کے بارے میں مطلع نہیں کیا گیا تھا ، خیال رہے کہ یورپی پارلیمنٹ نے ستمبر 2023 میں ہشام قاسم کے اصل مقدمے کو ’سیاسی محرکات پر مبنی‘ قرار دیا تھا۔

حشام قاسم کو تازہ ترین سزا ایک اور سابق وزیر محنت کی ہتک عزت اور ان کی شہرت کو داغدار کرنے کے الزامات میں سنائی گئی ہے، انہیں پہلی بھی اسی نوع کے الزامات کے تحت سزا ہوئی تھی۔

انسانی حقوق کی تنظیم مصری انیشیٹو فار پرسنل رائٹس نے اس فیصلے کی مذمت کرتے ہوئے اسے ’ سیاسی مقاصد کے لیے جاری عدالتی ظلم ’ قرار دیا۔

انسانی حقوق کی تنظیم کی جانب سے جاری بیان میں کہا گیا، ’ حشام قاسم پر اسی واقعے اور انہی الزامات کے تحت دوبارہ مقدمہ چلانا نہ صرف ایک ہی مدعا علیہ پر ایک ہی جرم کے لیے دو بار مقدمہ چلانا ہے، بلکہ ان کے سیاسی بیانات کے ذریعے حکومت پر تنقید اور ان کی سیاسی سرگرمیوں کی وجہ سے انہیں سزا دینے کی واضح خواہش کو بھی ظاہر کرتا ہے۔’

٘خیال رہے کہ مصر کے صدر عبدالفتاح السیسی کی انتظامیہ کو 2014 میں اقتدار میں آنے کے بعد سے انسانی حقوق کے حوالے سے اپنے ریکارڈ پر مسلسل تنقید کا سامنا رہا ہے۔

2022 سے، صدر عبدالفتاح السیسی کی انتظامیہ نے سیکڑوں سیاسی قیدیوں کو رہا کیا ہے، وہیں انسانی حقوق کے گروپوں کا کہنا ہے کہ اسی عرصے کے دوران اس سے کہیں زیادہ افراد کو حراست میں لیا گیا ہے