جنگی بحری بیڑے پر حملے کے بعد امریکا کا حوثیوں کے سیکیورٹی چیف کو مارنے کا دعویٰ

امریکا نے بمباری کرکے یمن میں کینسر کے علاج کی سہولت اور زراعت کے ذخیرے کو تباہ کردیا
یمن میں امریکا اور حوثی باغیوں میں شدید لڑائی کا سلسلہ جاری ہے، ایک جانب یمن کے حوثی باغیوں نے امریکا کے جنگی بحری بیڑے پر دو حملے کیے ہیں، دوسری جانب امریکا نے دعویٰ کیا ہے کہ ان کی حوثیوں کے خلاف کارروائی کے دوران یمنی حوثیوں کا سیکیورٹی چیف مارا گیا ہے۔

قطری نشریاتی ادارے الجزیرہ کے مطابق حوثی باغیوں نے امریکا کے بحری جنگی بیڑے پر دوسرے حملے کی ذمہ داری قبول کرلی۔

یمن کے حوثی باغیوں نے کہا ہے کہ انہوں نے گزشتہ 24 گھنٹوں کے دوران دوسری بار یو ایس ایس ہیری ٹرومین طیارہ بردار بحری جہاز پر حملہ کیا ہے اور جنگی جہاز پر ’متعدد ڈرونز اور بیلسٹک اور کروز میزائل‘ داغے ہیں۔

حوثی گروپ نے کہا کہ یہ حملہ کئی گھنٹوں تک جاری رہا اور دشمن کے اس حملے کو ناکام بنانے میں کامیاب رہا جو دشمن ہمارے ملک کے خلاف شروع کرنے کی تیاری کر رہا تھا۔

یمن میں حوثی گروپ کی جانب سے کہا گیا ہے کہ غزہ پر اسرائیلی حملے بند کیے جانے تک وہ بھی امریکی اور اسرائیلی جہازوں کو نشانہ بناتے رہیں گے۔

حوثیوں کے سیکیورٹی چیف کو مارنے کا امریکی دعویٰ

یمن پر امریکی فضائیہ کے حملوں میں جاں بحق افراد کی تعداد 53 ہوگئی، حملوں میں حوثیوں کے سیکیورٹی چیف کے جاں بحق ہونے کی بھی اطلاعات ہیں۔

امریکی قومی سلامتی کے مشیر مائیکل والٹز نے دعویٰ کیا ہے کہ یمن میں امریکی فضائی حملوں میں متعدد حوثی رہنما مارے گئے، امریکی عہدیدار نے حوثیوں کے 11 ڈرونز مار گرانے کا دعویٰ بھی کیا۔

اقوام متحدہ نے امریکا اور یمنی حوثیوں سے ایک دوسرے پر حملے روکنے کا مطالبہ کیا ہے۔

امریکا کے بھی یمن پر مسلسل حملے
امریکا نے یمن پر دوسرے روز بھی حملے جاری رکھے ہوئے ہیں، تازہ بمباری میں کینسر کے علاج کی سہولت اور زراعت کے ذخیرے کو تباہ کردیا گیا۔

یمن کے سرکاری خبر رساں ادارے ’صبا‘ نے مقامی حکام کے حوالے سے بتایا کہ امریکی افواج نے سعدہ شہر میں کینسر کی ایک تنصیب پر متعدد فضائی حملے کیے، جس سے ’بڑے پیمانے پر تباہی‘ ہوئی۔

سعدہ کے گورنر محمد عواد نے مقامی حکام کے ایک اجلاس کو بتایا کہ کئی رہائشی علاقے بھی متاثر ہوئے ہیں۔

صبا کی رپورٹ کے مطابق گورنر نے نشاندہی کی کہ امریکی دشمن کی جانب سے رہائشی علاقوں اور شہری تنصیبات بشمول کینسر ٹیومر کے علاج گاہ پر مشتمل عمارت کو نشانہ بنانا ناکامی کی حالت کی تصدیق کرتا ہے، یہ عمل دشمن کی الجھن، امریکا کا بدصورت اور مجرمانہ چہرہ ظاہر کرتا ہے۔

صبا کے مطابق وزارت زراعت نے الحدیدہ گورنر سیکریٹریٹ کے ضلع زبید میں کپاس کی ایک دکان کو نشانہ بنانے کی بھی مذمت کی ہے۔

وزارت نے کہا کہ سویلین انفرا اسٹرکچر کو نشانہ بنانے کا مقصد یمن میں انسانی مصائب کو دوگنا کرنا ہے۔

خامنہ ای کی یمن کے عوام کی مزاحمت کی تعریف

ایران کے سپریم لیڈر آیت اللہ خامنہ ای نے یمن کی حمایت کرتے ہوئے امریکا کے خلاف یمنی مزاحمت کی تعریف کی ہے۔

الجزیرہ کے مطابق ایران کے سپریم لیڈر آیت اللہ علی خامنہ ای نے امریکا کی یمن پر مہلک بمباری کے بعد یمن کے عوام کے ساتھ یکجہتی کا اظہار کیا ہے۔

انہوں نے ’ایکس‘ پر ایک پوسٹ میں لکھا کہ ’یمنی قوم یقینی طور پر فاتح ہے، واحد راستہ مزاحمت ہے۔‘

انہوں نے کہا کہ جس چیز نے آج امریکا اور اس کے اتحادیوں کو پریشان کیا وہ یہ حقیقت ہے کہ مسلم ممالک مضبوطی سے کھڑے ہیں اور یہ مزاحمت مؤثر ثابت ہوگی۔

سربراہ پاسداران انقلاب کی امریکا کو جوابی دھمکی
ایران کے پاسداران انقلاب نے امریکی صدر ڈونلڈ ٹرمپ کی جانب سے یمن کے حوثی باغیوں کے خلاف فضائی حملوں کا حکم اور ایران کو دھمکی دینے کے بعد کسی بھی حملے کا ’فیصلہ کن جواب‘ دینے کی دھمکی دی ہے۔

دی ٹائمز آف اسرائیل کے مطابق ہفتے کے روز ٹرمپ نے کہا تھا کہ امریکا نے بحیرہ احمر میں حوثیوں کے خطرے کو ختم کرنے کے لیے ’فیصلہ کن اور طاقتور فوجی کارروائی‘ کا آغاز کیا ہے اور متنبہ کیا کہ باغیوں کے لیے ایران کی حمایت فوری طور پر ختم ہونی چاہیے، حوثیوں کے صحت کے ایک عہدیدار نے بتایا کہ ان حملوں میں 31 افراد جاں بحق ہوئے ہیں۔

ایرانی پاسداران انقلاب کے سربراہ حسین سلامی نے ٹیلی ویژن پر نشر ہونے والی تقریر میں ٹرمپ کی دھمکیوں کی مذمت کرتے ہوئے کہا کہ ایران جنگ نہیں کرے گا، لیکن اگر کسی نے دھمکی دی تو وہ مناسب، فیصلہ کن اور فیصلہ کن جواب دے گا۔

کمانڈر پاسداران انقلاب نے حوثیوں کو یمنیوں کا نمائندہ قرار دیتے ہوئے کہا کہ گروپ نے اپنے تذویراتی اور آپریشنل فیصلے آزادانہ طور پر کیے ہیں۔

جنوری 2020 میں ٹرمپ کے پہلے دور حکومت میں امریکا نے بغداد میں ایک ڈرون حملے میں پاسداران انقلاب کے غیر ملکی آپریشنز کے کمانڈر قاسم سلیمانی کو شہید کر دیا تھا۔

اس کے چند دن بعد ایران نے جوابی کارروائی کرتے ہوئے عراق میں امریکی اور دیگر اتحادی افواج کے ٹھکانوں پر میزائل داغے، اس حملے میں کوئی امریکی اہلکار ہلاک نہیں ہوا تاہم واشنگٹن کا کہنا ہے کہ درجنوں افراد کو دماغی چوٹیں آئیں۔

اس سے قبل اتوار کے روز ایران کی وزارت خارجہ کے ترجمان اسمٰعیل بقائی نے ایک بیان میں امریکا کی جانب سے وحشیانہ فضائی حملوں کی شدید الفاظ میں مذمت کرتے ہوئے اسے ’اقوام متحدہ کے چارٹر کے اصولوں کی سنگین خلاف ورزی‘ قرار دیا تھا۔

ایران کے وزیر خارجہ عباس عراقچی نے کہا تھا کہ واشنگٹن کے پاس اسلامی جمہوریہ ایران کی خارجہ پالیسی کو ڈکٹیٹ کرنے کا کوئی اختیار نہیں۔

وزیر خارجہ نے امریکا پر زور دیتے ہوئے کہا تھا کہ امریکی حکومت کے پاس ایران کی خارجہ پالیسی کو ڈکٹیشن دینے کا کوئی اختیار نہیں ہے، انہوں نے امریکا پر زور دیا تھا کہ وہ یمنی عوام کا قتل عام بند کرے۔

ان کا کہنا تھا کہ وہ وقت جب واشنگٹن تہران کی خارجہ پالیسی کو ڈکٹیٹ کر سکتا تھا، 1979 میں ختم ہو گیا، جب اسلامی انقلاب نے مغربی حمایت یافتہ شاہ ایران کو معزول کر دیا۔

دریں اثنا روسی وزیر خارجہ سرگئی لاوروف نے امریکا پر زور دیا تھا کہ وہ یمن پر فضائی حملے بند کرے۔

لاوروف نے امریکی سیکریٹری خارجہ مارکو روبیو سے ٹیلی فون پر بات کی تھی