’کوہ ماکرا‘ سر کرنے کے دوران برفباری میں پھنسنے والے غیر ملکی مہم جوؤں کو بچالیا گیا

ریسکیو کیے گئے غیر ملکی نے خیبرپختونخوا پولیس کی تعریف کی، اور ’پاکستان زندہ باد‘ بھی کہا
وادی کاغان کی بلند ترین چوٹی ’کوہ ماکرا‘ کو سر کرنے کے مشن کے دوران شدید برف باری اور خراب موسم میں پھنسے 2 غیر ملکی مہم جوؤں کو پولیس نے اتوار کے روز بچالیا۔
ضلعی پولیس افسر (ڈی پی او) مانسہرہ شفیع اللہ خان گنڈاپور نے شوگران ٹورسٹ ریزورٹ میں صحافیوں کو بتایا کہ اللہ کا شکر ہے کہ ہم کوہ ماکرا کے بیس کیمپ میں شدید برف باری اور خراب موسم کی وجہ سے 19 گھنٹے سے پھنسے اطالوی اور فرانسیسی مہم جوؤں کو بچانے میں کامیاب ہوگئے ہیں۔

انسپکٹر جنرل آف پولیس خیبر پختونخوا ذوالفقار حمید اور ریجنل پولیس آفیسر ناصر محمود ستی کو متعلقہ سفارت خانوں کی جانب سے لاپتہ غیر ملکیوں کے بارے میں اطلاع ملنے کے بعد شفیع اللہ گنڈاپور کی سربراہی میں پولیس کی ایک ٹیم نے ریسکیو آپریشن کیا۔

کوہ ماکرا چوٹی سطح سمندر سے 12 ہزار 746 فٹ بلند ہے۔

انہوں نے بتایا کہ اطلاع ملنے پر ہم نے فوری طور پر آپریشن شروع کیا اور پوری رات ریسکیو آپریشن میں گزار دی، دونوں مہم جوؤں کو بیس کیمپ سے بحفاظت شوگران سیاحتی مقام پر منتقل کر دیا گیا۔

انہوں نے وضاحت کی کہ شدید برف باری اور خراب موسمی حالات کی وجہ سے غیر ملکیوں کا پولیس اور ان کے متعلقہ سفارت خانوں سے رابطہ منقطع ہوگیا تھا، جس کی وجہ سے رات کے وقت ریسکیو آپریشن کی ضرورت پڑی تھی۔

ڈی پی او نے کہا کہ ہم تفریح اور ایڈونچر کی سرگرمیوں کے لیے وادی کاغان آنے والے غیر ملکی سیاحوں کی حفاظت کو یقینی بنانے کے لیے ہر ممکن اقدام کر رہے ہیں۔

ان کا کہنا تھا کہ محکمہ موسمیات نے آئندہ 24 گھنٹوں کے دوران وادی کاغان میں ایک بار پھر شدید برف باری کی پیش گوئی کی ہے۔

اقوام متحدہ سے وابستہ غیر ملکیوں فرانسوا اور کارلو نے اپنی مشکلات بیان کیں اور بتایا کہ ہم کوہ ماکرا کو سر کرنے کے لیے نکلے تھے، لیکن موسم خراب ہوگیا، جس کے بعد شدید برف باری ہوئی اور ہم بیس کیمپ میں پھنس گئے۔

بازیاب کرائے گئے مہم جوؤں میں سے ایک نے تعریف کرتے ہوئے کہا کہ ’پاکستان زندہ باد، خیبر پختونخوا پولیس کا شکر گزار ہوں کہ انہوں نے ہمیں صحیح وقت پر بچایا اور ہمیں بحفاظت شوگران پہنچایا