قطر نے اولمپک گیمز 2036 کی میزبانی کے لیے باضابطہ بولی دے دی

دوحہ نےکے اولمپک اور پیرا اولمپک گیمز 2036 کی میزبانی کے لیے باضابطہ طور پر بولی دے دی ہے۔

خبر رساں ایجنسی ’اے ایف پی‘ کی رپورٹ کے مطابق توانائی پر انحصار کرنے والی خلیجی ریاست قطر اپنی معیشت کو متنوع بنانے کے لیے بڑے کھیلوں کے مزید ایونٹس کی میزبانی کرنے کی خواہاں ہے۔

خلیج کی سب سے چھوٹی اور امیر ترین ریاستوں میں شمار ہونے والا قطر اس سے قبل فیفا ورلڈ کپ 2022 کی میزبانی کر چکا ہے۔

قطر کے وزیر اعظم شیخ محمد بن عبدالرحمٰن آل ثانی نےکہا ہےکہ اگر قطر کو اولمپکس گیمز 2036 کی میزبانی مل جاتی ہے تو قطر اولمپکس کی میزبانی کرنے والا مشرقِ وسطیٰ اور شمالی افریقہ کا پہلا ملک بن جائے گا۔

انہوں نے سرکاری قطر نیوز ایجنسی پر جاری ایک بیان میں کہا کہ اولمپک اور پیرا اولمپک گیمز 2036 کی میزبانی کے لیے قطر اولمپک کمیٹی کی طرف سے دی جانے والی سرکاری بولی قطر کے سفر میں ایک نیا سنگ میل ثابت ہوگی۔

شیخ محمد بن عبدالرحمٰن آل ثانی نے مزیدکہا کہ اولمپک گیمز 2036 کی بولی قطر کے اُس ریکارڈ پر مبنی ہے جس میں اس نے فیفا ورلڈ کپ 2022 سمیت کئی بڑے بین الاقوامی کھیلوں کے ایونٹس کی کامیابی کے ساتھ میزبانی کی۔

ایمنسٹی انٹرنیشنل اور دیگر انسانی حقوق کی تنظیموں نے دعویٰ کیا تھا کہ 2022 کے ورلڈ کپ سے قبل ہزاروں تارکین وطن مزدور جاں بحق ہوئے، تاہم دوحہ کا کہنا ہے کہ صرف 37 مزدور ورلڈ کپ منصوبوں پر ہلاک ہوئے، جن میں سے صرف3 کی اموات کام سے متعلق حادثات میں ہوئیں۔

قطر اولمپک کمیٹی کے صدر شیخ جوعان بن حمد آل ثانی نے کہا کہ دوحہ نےکھیل کو اپنی قومی حکمت عملی کا مرکزی ستون بنایا ہے۔

انہوں نے کہا کہ ہم نے گیمز کی میزبانی کے لیے درکار 95 فیصد اسپورٹس انفراسٹرکچر پہلے ہی مکمل کر لیا ہے اور ہمارے پاس ایک جامع قومی منصوبہ موجود ہے تاکہ تمام سہولیات کو 100 فیصد تیار کیا جا سکے۔

اب ممالک پر لازم نہیں کہ وہ اپنی اولمپک بولی کو عوامی طور پر ظاہر کریں، اولمپک گیمز ہر بار مختلف براعظم میں منعقد کیے جاتے ہیں۔

اولمپک گیمز 2024، 2028 اور 2032 بالترتیب یورپ، شمالی امریکا اور اوشیانا میں ہو رہے ہیں، لہذا 2036 کے اولمپک گیمز کے ایشیا یا افریقہ (جہاں آج تک کبھی اولمپکس نہیں ہوئے) میں منعقد ہونے کے امکانات بڑھ گئے ہیں۔

گزشتہ ماہ ہی بین الاقوامی اولمپک کمیٹی کی پہلی خاتون سربراہ بننے والی کرسٹی کوونٹری کے لیے اولمپک 2036 کے میزبان ملک کا انتخاب کرنا ایک بڑا منصوبہ ہوگا