آئی سی سی نے ون ڈے، ٹیسٹ اور ایمرجنگ کرکٹرز آف دی ایئر کا اعلان کردیا

انٹرنیشنل کرکٹ کونسل (آئی سی سی) نے مردوں کی کیٹیگری میں ون ڈے، ٹیسٹ اور ایمرجنگ کرکٹرز آف دی ایئر کے ناموں کا اعلان کردیا۔

آئی سی سی نے سال 2024 کے اختتام پر پورے سال تمام فارمیٹ میں بہترین کارکردگی کا مظاہرہ کرنے والے کھلاڑیوں کے ناموں کا اعلان کردیا۔

آئی سی سی نے بھارت کے فاسٹ باؤلر جسپریت بمرا کو ’ٹیسٹ کرکٹر آف دی ایئر‘ قرار دیا۔

بمراہ نے نہ صرف اپنے ملک میں ہونے والی ٹیسٹ سیریز کے دوران بہترین کارکردگی دکھائی بلکہ غیر ملکی کنڈیشنز میں بھی ان کی پرفارمنس نمایاں رہی، خاص طور پر دورہ آسٹریلیا میں انہوں نے کینگروز بلے باز کو خوب پریشان کیا اور وہ مین آف دی سیریز بھی قرار پائے۔

جسپریت بمرا نے بھارت کو آئی سی سی ورلڈ ٹیسٹ چیمپئن شپ کی دوڑ میں برقرار رکھنے میں اہم کردار ادا کیا اور انہوں نے بھارتی ٹیم کی کامیابیوں میں نمایاں حصہ ڈالا۔

آئی سی سی ون ڈے کرکٹر آف دی ایئر کا ایوارڈ افغان آل راؤنڈر عظمت اللہ عمرزئی کے نام رہا، انہوں نے گزشتہ سال 14 ون ڈے انٹرنیشنل میں 52 کی اوسط سے 417 رنز بنائے اور اس دوران 17 وکٹیں بھی حاصل کیں۔

عظمت اللہ کی نمایاں کارکردگیوں میں سری لنکا کے خلاف ناقابل شکست 149 رنز اور جنوبی افریقہ کے خلاف 50 گیندوں پر 86 رنز شامل تھے۔

افغانستان نے 2024 میں اپنی پانچ میں سے چار ون ڈے سیریز جیتیں، جس میں عظمت اللہ کی کارکردگی مرکزی حیثیت رکھتی تھی۔

ایک اور بھارتی فاسٹ باؤلر ارشدیب سنگھ کو ٹی20 کرکٹر آف دی ایئر قرار دیا گیا، اس کیٹیگری میں قومی ٹیم کے سابق کپتان بابراعظم، زمبابوے کے کپتان سکندر رضا اور آسٹریلیا کے جارح مزاج بلے باز ٹریوس ہیڈ کو بھی نامزد کیا گیا تھا۔

ارشدیب سنگھ نے گزشتہ سال امریکا اور ویسٹ انڈیز میں ہونے والے ٹی20 ورلڈکپ میں نمایاں کارکردگی کے ذریعے بھارت کو ایک بار پھر ٹی20 کا عالمی چیمپئن بنوانے میں اہم کردار ادا کیا۔

بھارت کے فاسٹ باؤلر ارشدیب سنگھ نے گزشتہ سال 18 میچوں میں 36 وکٹیں حاصل کیں۔

آئی سی سی ایمرجنگ کرکٹر آف دی ایئر کا ایوارڈ سری لنکا کے کمیندو مینڈس کے نام رہا، آئی سی سی نے قومی کرکٹ ٹیم کے اوپنر صائم ایوب کو بھی ’ایمرجنگ کرکٹر آف دی ایئر ایوارڈ‘ کے لیے نامزد کیا تھا، اس کے علاوہ ویسٹ انڈیز کے فاسٹ باؤلر شمار جوزف اور انگلینڈ کے گس ایٹکنسن بھی نامزد ہوئے تھے