معروف بھارتی میوزیکل آرٹسٹ، ماڈل اور بگ باس 13 کے رنر اپ عاصم ریاض نے انکشاف کیا ہے کہ سدھارتھ شکلا کی موت کے روز انہیں خواب آیا تھا اور انہیں لگ رہا تھا کہ اس کے ساتھ کچھ برا ہونے والا ہے۔

بھارتی میڈیا کی رپورٹ کے مطابق ایک انٹرویو کے دوران عاصم نے سدھارتھ کی موت اور بگ باس جیتنے کے حوالے سے بات کی جس کے بعد عاصم سمیت سدھارتھ بھی ٹوئٹر پر ٹاپ ٹرینڈ کررہے ہیں۔

انٹرویو میں عاصم ریاض نے بتایا کہ ‘میں اپنی ماں کی قسم کھاکے کہتا ہوں کہ موت کے روز سدھارتھ میرے خواب میں آیا تھا، مجھے علم ہوگیا تھا کہ ایسا کچھ ہونے والا ہے’۔

عاصم کے مطابق ‘سدھارتھ کی موت کے دن میرے کزن کا فون آیا اور اس نے مجھ سے ٹی وی پر خبریں دیکھنے کا کہا، اس نے مجھے نہیں بتایا کہ اصل معاملہ کیا ہے کیونکہ میں سدھارتھ سے بہت زیادہ اٹیچ تھا، اس کے ساتھ کئی دن بگ باس کے گھر میں رہا اور میں ایک انتہائی حساس اور جذباتی انسان ہوں’۔

انہوں نے کہا کہ ‘جیسا تعلق میرا سدھارتھ کے ساتھ تھا ویسا کسی کے ساتھ قائم نہیں ہوسکا، ہمارا الگ ہی رشتہ تھا، لڑنا تو چار دنوں تک بات نہیں کرنا، ہنسنا تو 4 دن تک ہنستے رہنا’۔

عاصم نے کہا ‘سدھارتھ کے بعد میں نے اپنا 26 سالہ کزن کھویا، اس کے بعد میرا ایک اور دوست مجھ سے بچھڑ گیا، میری زندگی اچانک تبدیل ہوئی، میں نے سوچا اگر کسی دن میرے ساتھ بھی کچھ ایسا ہوگیا تو میں کیا کروں گا؟’

اس کے علاوہ بھارتی ماڈل نے بگ باس اور بھارتی چینل پر الزام عائد کیا کہ انہوں نے سدھارتھ کو جان بوجھ کر جتوایا کیونکہ وہ عاصم کو نہیں جتوانا چاہتے تھے۔