صحرائے صحارا سے آنے والے اینٹی سائیکلون سسٹم سربیرس کے اثرات سے یورپ کے شہری بلبلا اٹھے۔

غیر ملکی خبر رساں ادارے کے مطابق سربیرس سے یورپ میں شدید گرمی کی لہر دیکھنے میں آئی جس نے سیاحوں کو بےحال کردیا، گرمی سے پریشان سیاحوں نے سوئمنگ پولز اور سایہ دار جگہوں کا رخ کرلیا۔
ادھر اٹلی میں 40 ڈگری سینٹی گریڈ کے درجہ حرارت میں کام کرنے والا شخص ہلاک ہوگیا جب کہ اٹلی کے 8 بڑے شہروں میں ہیٹ ویو ریڈ الرٹ جاری کیا گیا ہے۔

اٹلی کے دو سب سے بڑے جزیروں سسلی اور سارڈینیا میں پارہ 45 ڈگری تک پہنچنے کا امکان ہے ۔

مزید برآں قبرص میں 41،کروشیا میں 39 اور فرانس میں 34 ڈگری تک رہنے کاامکان ہے۔

بحیرہ روم میں ہیٹ ویو 2 ہفتے تک رہنے کا امکان
ماہرین کا کہنا ہے کہ بحیرہ روم میں ہیٹ ویو 2 ہفتے تک رہ سکتی ہے۔

امریکی ریاستوں نیویارک، نیوجرسی، کنیکٹی کٹ، پنسلوینیا، میسا چوسٹس اور ورمونٹ میں بارشوں سے نظام زندگی درہم برہم ہوگیا جس کے بعد ورمونٹ میں ایمر جنسی نافذ کردی گئی ہے۔

ماہرین کا کہناہے کہ موسمیاتی تبدیلی کے سبب گرم موسم شدید بارشوں کا سبب بن رہا ہے۔