لاہور:وزیرِ ریلوے شیخ رشید احمد نے کہا ہے کہ وزیرِ اعظم عمران خان نے مسئلہ کشمیر کا کیس بھرپور طریقے سے لڑا،

بھارت سے مذاکرات کے دروازے بند ہوچکے،اب فیصلہ عمران خان نے کرنا ہے۔لاہور میں نیوز کانفرنس کرتے ہوئے انہوں نے کہا کہ بھارت کے مسلمان پاکستان کی طرف دیکھ رہے ہیں، بھارت میں مسلمانوں پر ظلم ہو تو پاکستان کوآواز اٹھانی چاہیے۔

انہوں نے کہا کہ وزیراعظم عمران خان نے کشمیر کا زوردار مقدمہ لڑا، کوئی شملہ نہ واجپائی معاہدہ رہا ہے بھارت سے مذاکرات کے دروازے بند ہوچکے، اب فیصلہ عمران خان نے کرنا ہے،

عمران خان کا کشمیر پر وہی فیصلہ ہو گا جو کشمیریوں کا ہو گا، کشمیری صرف کشمیر کی طرف دیکھ رہے ہیں، آج چین بھی کشمیر کے ساتھ کھڑا ہے۔

انہوں نے کہا کہ نریندر مودی نے فاشزم کی بدترین مثالیں قائم کیں، بھارت میں اتنی ہمت نہیں کہ وہ پاکستان کی سرحد کی طرف دیکھے، مودی نے کشمیر کے معاملے پر بہت بڑی غلطی کی ہے،

بھارت سے تمام مذاکرات کے راستے بند ہو چکے ہیں، کشمیر، بوسنیا اور فلسطین نہیں ہے۔انہوں نے مزید کہا کہ عمران خان کی قیادت میں ریلوے کو ٹھیک کریں گے، 15 ستمبر تک ٹرینوں کا شیڈول ٹھیک ہو جائے گا اور بائیو میٹرک کے بعد چھٹی کرنے والے کی تنخواہ کٹے گی۔

وزیر ریلوے نے یہ بھی بتایا کہ 4 ارب کا خسارہ کم کیا ہے، 80 لاکھ مسافروں کا اضافہ کیا ہے، اربوں روپے کی ریلوے کی زمین واگزار کروائی ہے۔انہوں نے کہا کہ وفاقی کابینہ نے نیب قوانین میں ترمیم کا فیصلہ کیا ہے،

بیورو کریسی کی وجہ سے کام میں مشکلات ہیں، بیورو کریٹس کام نہیں کررہے اور ڈرے ہوئے ہیں، وزیراعظم کو بھی بتا چکا ہوں کہ بیوروکریٹس کام نہیں کررہے اور ہینڈز اپ کرچکے ہیں،

نواز شریف اور شہباز شریف کیلئے یہ سارے کام کرتے رہے ہیں، لیکن عمران خان کی حکومت میں نہیں کررہے۔ انہوں نے کہا کہ مریم نواز نے ساری مصیبت اپنے سر مول لی اور سارے خاندان کی سیاست کو تباہ و برباد کردیا،

جج ویڈیو اسکینڈل شریف خاندان کو مروائے گا، شہباز شریف سمجھدار اور میری پارٹی کا آدمی ہے لیکن وہ پھنس گئے ہیں، ایک طرف ان کا خون اور دوسری طرف سیاست ہے، لیکن وہ نہ ہی خون اور نہ ہی سیاست کو بچاسکیں گے۔