بیجنگ: چین میں کورونا وائرس سے ہلاکتوں کی تعداد 1800 سے تجاوز کرگئی جب کہ ووہان ہسپتال کے ڈائریکٹر بھی وائرس سے چل بسے۔غیر ملکی میڈیا کے مطابق وائرس سے سب سے زیادہ متاثر ہونے والے صوبے ہوبئی میں مزید 98 افراد زندگی کی بازی ہارگئے جس کے بعد ہلاکتوں کی تعداد 1873 ہوگئی۔

جب کہ ووہان کے ہسپتا ل میں کورونا وائرس کا علاج کرنے والے ہسپتا ل کے ڈائریکٹر بھی وائرس کا شکار ہوکر چل بسے۔چینی حکام کے مطابق ملک میں کورونا وائرس کے مزید 187 کیسز کی تصدیق ہوئی جن میں زیادہ تر کا تعلق ہوبے سے ہے، نئے کیسز کے بعد متاثرہ افراد کی تعداد 72 ہزار 436 ہوگئی ۔

جنوری سے پہلی مرتبہ چین کے مرکزی شہروں میں وائرس سے متاثرہ افراد کی تعداد 2ہزار سے کم ریکارڈ کی گئی۔حکام کے مطابق 30 جنوری سے ملک بھر میں روزانہ کی بنیاد پر وائرس سے متاثرہ افراد کی تعداد 2 ہزار سے نیچے نہیں تھے اور اس دوران 11 فروری سے ہلاکتوں کی تعداد 100سے کم نہیں ہوئی تھی۔

چینی حکام نے کہا کہ کیسز کی تعداد میں کمی اس بات کی علامت ہے کہ انتظامیہ نے وائرس کو روکنے کے لیے سخت اقدامات اٹھائے ہیں۔دوسری جانب پولیس نے وائرس کے معاملے پر چینی صدر کو نشانے بنانے والے ایک مفرور سرگرم شخص کو بھی گرفتار کرلیا ۔علاوہ ازیں جاپان نے اعلان کیا ہے کہ وہ جلد کورونا وائرس کے علاج کے لیے تجرباتی بنیادوں پر ایچ آئی وی کا طریقہ علاج استعمال کرنے کا اعلان کیا ہے۔