امریکا کی کل سے 25 فیصد اضافی ٹیرف کے نفاذ کی تصدیق، بھارتی اسٹاک مارکیٹ کو جھٹکا

بھارتی برآمدات کو اب 50 فیصد امریکی محصولات کا سامنا کرنا پڑے گا۔
امریکی محکمہ ہوم لینڈ سیکیورٹی کی جانب سے کل سے بھارت سے آنے والی تمام مصنوعات پر مزید 25 فیصد محصول عائد کرنے کی تصدیق کے بعد بھارتی حصص منگل کو ابتدائی کاروبار کے گراوٹ کا شکار رہے، اور اگست کے تمام منافع ختم ہوگئے۔

برطانوی خبر رساں ادارے ’رائٹرز‘ کی رپورٹ کے مطابق نِفٹی 50 اور بمبئی اسٹاک ایکسچینج (بی ایس ای) سنسیکس منگل کی صبح 10 بج کر 39 منٹ یعنی پاکستانی وقت کے مطابق صبح 10 بج کر 9 منٹ تک 7 فیصد کمی سے بالترتیب 24 ہزار 787 اور 81 ہزار 28 پوائنٹس کی سطح پر تھے۔

یہ دونوں اشاریے اس مہینے معمولی تبدیلی کے ساتھ کاروبار کر رہے تھے، جب کہ جولائی میں تقریباً 3 فیصد کمی ریکارڈ کی گئی تھی۔

16 بڑے شعبوں میں سے 15 منگل کو مندی کا شکار ہوئے، درمیانے اور چھوٹے درجے کے حصص میں بھی تقریباً 1 فیصد کمی آئی۔
بھارتی برآمدات کو اب امریکی ڈیوٹیز کا سامنا کرنا پڑے گا، جو 50 فیصد تک ہوں گی جو واشنگٹن کی جانب سے عائد کردہ سب سے زیادہ محصولات میں شامل ہیں، کیوں کہ امریکی صدر ڈونلڈ ٹرمپ نے رواں ماہ کے اوائل میں نئی دہلی کی جانب سے روسی تیل کی خریداری میں اضافے کے جواب میں اضافی محصولات عائد کرنے کا اعلان کیا تھا۔

آئی سی آئی سی آئی سیکیورٹیز کے ریٹیل ریسرچ کے سربراہ پانکج پانڈے نے کہا کہ اگرچہ یہ خبر مارکیٹ کے لیے منفی ہے، لیکن ہمیں یہاں سے بڑی گراوٹ کی توقع نہیں ہے، کیوں کہ یہ کوئی چونکا دینے والی پیش رفت نہیں ہے۔

نِفٹی 50 میں سب سے زیادہ وزن رکھنے والا اسٹاک ریلائنس انڈسٹریز تقریباً 1 فیصد گر گیا، بڑے مالیاتی اداروں کے حصص میں 1.1 فیصد اور فارماسیوٹیکل کمپنیوں میں 1.4 فیصد کمی آئی۔

ٹیکسٹائل، کیمیکلز اور جھینگا برآمد کرنے والی کمپنیوں کے حصص بھی گرے ،کیوں کہ یہ شعبے امریکی محصولات سے سب سے زیادہ متاثر ہونے کا خدشہ رکھتے ہیں۔

پانڈے نے مزید کہا کہ آئندہ دنوں میں مارکیٹ کا رجحان مخصوص شعبوں یا کمپنیوں پر مرکوز رہے گا، کیوں کہ برآمدات پر انحصار کرنے والے حصص محصولات کے دباؤ میں رہ سکتے ہیں، جب کہ گھریلو معیشت سے جڑے شعبے کھپت میں اضافے کے باعث بہتر کارکردگی دکھا سکتے ہیں۔

منگل کو صارفین سے متعلق حصص میں 0.3 فیصد اضافہ ریکارڈ کیا گیا، جو 16 بڑے شعبوں میں واحد مثبت کارکردگی دکھانے والا شعبہ رہا۔

دیگر کمپنیوں میں ٹیلی کام آپریٹر ووڈافون آئیڈیا کے حصص 10 فیصد گر گئے، کیوں کہ متعدد رپورٹس میں کہا گیا کہ حکومت واجبات پر اضافی ریلیف دینے پر غور نہیں کر رہی