فیصل آباد: چیمپئنز ون ڈے کپ 2024 کے پانچویں میچ میں پینتھرز کی لائنز کیخلاف بیٹنگ جاری ہے۔
فیصل آباد کے اقبال کرکٹ سٹیڈیم میں جاری چیمپئنز ون ڈے کپ 2024 کے پانچویں میچ میں پینتھرز نے ٹاس جیت کر پہلے بیٹنگ کرنے کا فیصلہ کیا جو زیادہ اچھا ثابت نہ ہو سکا۔
پینتھرز کی جانب سے صائم ایوب اور ازان اویس نے اننگز کا آغاز کیا مگر اوپنر بلے باز ازان اویس کوئی خاطر خواہ کارکردگی نہ دکھا سکے اور محض ایک رن بنا کر سراج الدین کی گیند پر عرفان خان کو کیچ دے بیٹھے۔
ازان اویس کے بعد آنے والے بلے باز عمر قادر بھی صائم ایوب کا ساتھ نہ نبھا سکے اور بغیر کھاتہ کھولے ہی پویلین لوٹ گئے، انہیں کپتان شاہین شاہ آفریدی نے سجاد علی کے ہاتھوں کیچ آؤٹ کروایا۔
دو کھلاڑی جلد آؤٹ ہونے کے بعد اوپنر بلے باز صائم ایوب اور عثمان خان بھی ٹیم کیلئے کچھ اچھا نہ کرسکے اور دونوں بالترتیب 10 اور 11 رن بنا کر چلتے بنے، ان کی وکٹیں عامر یامین اور سراج الدین نے لیں۔
پینتھرز کے 4 کھلاڑی آؤٹ ہونے کے بعد مبصر خان اور حیدر علی نے ذمہ دارانہ بیٹنگ کا مظاہرہ کرتے ہوئے ٹیم کا سکور آگے بڑھایا اور دونوں نے اپنی نصف سنچریاں مکمل کیں، مبصر خان اس وقت 84 اور حیدر علی 51 رنز پر کریز پر موجود ہیں اور پینتھرز نے مجموعی طور پر 180 رنز بنا لیے ہیں۔