چکن گونیا وائرس کی بڑی عالمی وبا پھوٹنے کا خطرہ ہے، عالمی ادارہ صحت

عالمی ادارہ صحت (ڈبلیو ایچ او) نے خبردار کیا ہے کہ چکن گونیا وائرس کی ایک بڑی عالمی وبا پھوٹنے کا خطرہ موجود ہے، اور اس کے تدارک کے لیے فوری اقدامات کی ضرورت ہے۔

خبر رساں ادارے ’اے ایف پی‘ کی رپورٹ کے مطابق ڈبلیو ایچ او کا کہنا ہے کہ اسے وہی ابتدائی علامات نظر آرہی ہیں جو دو دہائی قبل ایک بڑے وبائی پھیلاؤ سے قبل دیکھی گئی تھیں، اور اس بار وہ ایسی صورتحال کو دہرانا نہیں چاہتا، چکن گونیا ایک مچھر کے ذریعے پھیلنے والا وائرس ہے جو بخار اور شدید جوڑوں کے درد کا سبب بنتا ہے، جو اکثر انتہائی تکلیف دہ ہوتا ہے، بعض صورتوں میں یہ مہلک بھی ہو سکتا ہے۔

ڈبلیو ایچ او کی ماہر ڈیانا روہاس الواریز نے بتایا کہ ’چکن گونیا ایک ایسا مرض ہے جس سے زیادہ لوگ واقف نہیں، لیکن یہ اب تک دنیا کے 119 ممالک میں پایا جاچکا اور منتقل ہوا ہے، جس سے 5.6 ارب افراد کو خطرہ لاحق ہے‘۔

انہوں نے یاد دلایا کہ 2004 سے 2005 کے دوران چکن گونیا کی ایک بڑی وبا نے بحرِ ہند کے جزیروں کو متاثر کرنے کے بعد عالمی سطح پر 5 لاکھ سے زائد افراد کو متاثر کیا تھا۔

انہوں نے جنیوا میں پریس بریفنگ کے دوران بتایا کہ ’آج ڈبلیو ایچ او کو وہی پیٹرن دوبارہ ابھرتا ہوا دکھائی دے رہا ہے، 2025 کے آغاز سے ری یونین، مایوٹ اور ماریشس میں چکن گونیا کی بڑی وبائیں رپورٹ ہو چکی ہیں‘۔

انہوں نے کہا کہ ری یونین کی ایک تہائی آبادی کے اس وائرس سے متاثر ہونے کا خدشہ ہے۔

ڈبلیو ایچ او کے مطابق چکن گونیا کی علامات ڈینگی اور زیکا وائرس جیسی ہوتی ہیں، اس لیے تشخیص میں مشکل پیش آ سکتی ہے۔

روہاس الواریز نے مزید کہا کہ 20 سال قبل کی طرح اس بار بھی وائرس علاقائی سطح پر دوسرے ممالک میں پھیل رہا ہے جن میں مڈغاسکر، صومالیہ اور کینیا شامل ہیں، جب کہ جنوبی ایشیا میں بھی وبائی سطح پر منتقلی جاری ہے۔

یورپ میں بھی اس وائرس کے درآمد شدہ کیسز رپورٹ ہوئے ہیں، جو بحرِ ہند کے جزیروں سے تعلق رکھتے ہیں، فرانس میں مقامی سطح پر وائرس کی منتقلی کی تصدیق ہو چکی ہے، جب کہ اٹلی میں بھی مشتبہ کیسز سامنے آئے ہیں