پاکستان چین کیساتھ اقتصادی تعلقات کو نئی بلندیوں پر لے جانا چاہتا ہے، وزیراعظم

وزیراعظم شہباز شریف نے چین کی صنعتوں کو پاکستان میں سرمایہ کاری کی دعوت دیتے ہوئے کہا ہے کہ حکومت خصوصی اقتصادی زونز کے قیام کے لئے ہرممکن سہولیات فراہم کرے گی۔

ایسوسی ایٹڈ پریس آف پاکستان (اے پی پی) کے مطابق وزیراعظم شہباز شریف سے چین کی معروف کمپنی شینڈونگ زن زو گروپ کارپوریشن کے چیئرمین ہیو جیانزن کی قیادت میں وفد نے ملاقات کی، وفد کی قیادت شینڈونگ زن زو گروپ کے چیئرمین ہیو جیانزن کر رہے تھے۔

ملاقات میں وفاقی وزیر بحری امور جنید انوار چوہدری، وزیراعظم کے مشیر ڈاکٹر توقیر شاہ اور متعلقہ اعلیٰ سرکاری حکام بھی موجود تھے۔

اس موقع پر وزیراعظم کا کہنا تھا کہ دونوں ممالک ہر مشکل میں ایک دوسرے کے ساتھ کھڑے رہے ہیں، حکومت خصوصی اقتصادی زونز کے قیام کے لیے ہرممکن سہولیات فراہم کرے گی۔

انہوں نے چین کے ساتھ اقتصادی تعلقات کو نئی بلندیوں پر لے جانے کی پاکستان کی خواہش کا اعادہ کرتے ہوئے چینی صنعتوں کو پاکستان میں سرمایہ کاری کی دعوت دی۔

ملاقات کے دوران شہباز شریف کو بتایا گیا کہ پاکستان کے شپ بریکنگ اور شپ ری سائیکلنگ کے شعبوں میں بے پناہ استعداد موجود ہے۔

چینی کمپنی شینڈونگ کے چیئرمین نے حکومت پاکستان کی جانب سے سہولیات کی فراہمی پر وزیراعظم کا شکریہ ادا کرتے ہوئے کہا کہ شینڈونگ پاکستان میں میری ٹائم انڈسٹریل کمپلیکس کے قیام میں دلچسپی رکھتی ہے، شینڈونگ پاکستان میں گرین شپ بریکنگ یارڈ تعمیر کرے گی۔

انہوں نے کہا کہ ان کی کمپنی ماہی گیری ، فش اور کھجوروں کی پراسیسنگ کے حوالہ سے پاکستان کی استعداد سے فائدہ اٹھانا چاہتی ہے