پاکستان ٹرائی نیشن سیریز کا فاتح بن گیا، افغانستان کو 75 رنز سے شکست
پاکستان ٹرائی نیشن سیریز کا فاتح بن گیا، فائنل مقابلے میں افغانستان کو 75 رنز سے شکست دے دی ہے۔

شارجہ کرکٹ اسٹیڈیم میں کھیلے گئے فائنل مقابلے میں پاکستانی اسپنر محمد نواز افغان بیٹرز کے لیے بھیانک خواب ثابت ہوئے، پاکستان کے 142 رنز کے ہدف کے تعاقب میں افغستان کی پوری ٹیم 66 رنز بنا کر آل آؤٹ ہوگئی۔

لیف آرم اسپنر محمد نواز نے ہیٹ ٹریک سمیت 5 وکٹیں حاصل کر کے افغان ٹیم کی کمر توڑ دی، صفیان مقیم اور ابرار احمد نے 2،2 وکٹیں اپنے نام کیں، شاہین شاہ آفریدی نے ایک شکار کیا۔

فغان ٹیم کے 9 کھلاڑی ڈبل فگر میں بھی داخل نہ ہو سکے، کپتان راشد خان 17 اور صدیق اللہ اتل 13 رنز بنا کر نمایاں رہے۔

اس سے قبل، پاکستان نے ٹاس جیت کر بیٹنگ کرنے کا فیصلہ کیا، پاکستان ٹیم نے مقررہ 20 اوورز میں 8 وکٹوں کے نقصان پر 141 رنز بنائے۔

اوپنر بلے باز فخر زمان 27، محمد نواز 25 اور کپتان سلمان علی آغا 24 رنز بنا کر آؤٹ ہوئے، صائم ایوب 17، حسن نواز اور فہیم اشرف 15،15 رنز بنا کر پویلین واپس لوٹے۔

آؤٹ آف فارم محمد حارث ایک بار پھر ناکام رہے اور صرف 2 رنز بناکر نور احمد کا شکار بنے جب کہ صاحب زادہ فرحان کھاتہ بھی کھول نہ سکے۔

افغانستان کے اسپنر نے مجموعی طور پر 6 وکٹیں حاصل کیں، کپتان راشد خان نے 3، نور احمد نے 2 جب کہ اے ایم غضنفر نے ایک وکٹ اپنے نام کی، جب کہ فاسٹ باؤلر فضل حق فاروقی نے 19 رنز دے کر 2 وکٹیں حاصل کیں۔

چیئرمین پی سی بی کی مبارکباد
سہ فریقی سیریز میں شاندار فتح پر چیئرمین پاکستان کرکٹ بورڈ (پی سی بی) محنس نقوی نے قومی کرکٹ ٹیم کو مبارک باد دیتے ہوئے کہا کہ اسپنر محمد نواز کی شاندار باؤلنگ نےمیچ کا پانسہ پلٹا، محمد نواز کی ہیٹ ٹرک اور جارحانہ آل راؤنڈ کارکردگی نے سیریز جیتنے میں اہم کردار ادا کیا۔

محسن نقوی نے مزید کہا کہ پاکستانی کھلاڑیوں نےکم اسکور ہونے کے باوجود ٹیم ورک کا مظاہرہ کر کے فائنل میں افغانستان کی ٹیم کو شکست دی، بہترین کارکردگی پر ہیڈکوچ مائیک ہیسن،کپتان سلمان آغا اور تمام کھلاڑی مبارک باد کے مستحق ہیں۔

انہوں نے مزید کہا کہ آج کی جیت سےکھلاڑیوں کا مورال بلند ہوا، اُمید ہے پاکستانی ٹیم ایشیا کپ 2025 میں بھی ایسی ہی عمدہ کارکردگی دکھائے گی۔