صدر پاکستان مسلم لیگ (ق)چودھری شجاعت نے پنجاب کی وزارت اعلیٰ کے انتخاب میں حمایت کے حوالے سے واضح کیا ہے کہ ان کے امیدوار چودھری پرویز الٰہی ہی ہیں ۔

نجی ٹی وی “جیو نیوز “کے مطابق پنجاب کی وزارت اعلیٰ کے لیے 22 جولائی کو ہونے والے انتخاب سے قبل چودھری شجاعت ملکی سیاست میں مرکز نگاہ بنے ہوئے ہیں اور چودھری پرویز الٰہی کے وزیر اعلیٰ بننے یا حمزہ شہباز کے وزیراعلیٰ برقرار رہنے کا دارومدار چودھری شجاعت کے فیصلے پر ہے۔

نجی ٹی وی کے مطابق چودھری شجاعت حسین کا کہنا ہے کہ جن کو مینڈیٹ ملا حکومت کرنا ان کا حق ہے، ایک بار نہیں 2،3بار پہلے بھی یہی بات کہہ چکا ہوں، مجھے صفائی پیش کرنے کی کوئی ضرورت نہیں۔سربراہ  مسلم لیگ (ق )نے کہا کہ ملکی مسائل کا حل اسی میں ہےکہ گنتی کے چکروں سے باہر نکلا جائے اور غریب آدمی کے مسائل کی طرف توجہ دی جائے، جو غریبوں کے مسائل حل کرنے میں کامیاب ہو گا حقیقی معنوں میں اسی کی گنتی پوری ہو جائے گی۔

انہوں نے مزید کہا کہ جو منتخب ہوئے ہیں وہ عوام کی خدمت کریں، اس فکرمیں نا پڑیں کہ ایک دوسرے کو کیسے نیچے دکھانا ہے، ملکی مسائل کا حل اسی میں ہے کہ سال ڈیڑھ سال حکومت کا موقع ملنا چاہیے یا فوری انتخابات ہوں، فوری انتخابات سے مراد فوری ہیں مہینوں میں نہیں۔