لاہور کے علامہ اقبال انٹرنیشنل ایئر پورٹ پر مسافروں کی آمد کے لیے مختص لاؤنج میں فائرنگ کے نتیجے میں ایک شخص جاں بحق 2 زخمی ہوگئے۔فائرنگ سے ایئر پورٹ پر خوف و ہراس پھیل گیا اور گردو نواح کے علاقے کو بند کردیا جس سے ایئر پورٹ جانے اور آنے والے مسافر پھنس کر رہ گئے۔فائرنگ کی اطلاع ملتے ہیں پولیس اور رینجرز کی بھاری نفری ایئرپورٹ میں داخل ہوگئی جبکہ ریسکیو اہلکاروں نے جائے وقوعہ پر پہنچ کر زخمیوں کو طبی امداد کے لیے ہسپتال منتقل کیامیڈیا رپورٹس کے مطابق واقعہ ذاتی دشمنی کا شاخسانہ ہے اور مقتول عمرہ کر کے وطن واپس آئے تھے۔ریسکیو ذرائع کے مطابق فائرنگ سے 2 افراد زخمی ہوئے، ڈان کو موصول ہونے والی تصاویر میں ایک مقتول کو زمین پر گرے ہوئے دیکھا جاسکتا ہے جس کے اردگرد رشتہ دار خواتین بیٹھی تھیں۔پولیس ذرائع کا کہنا ہے کہ واقعے کے ایک ملزم کو حراست میں لیا جاچکا ہے۔