حکومت کا حج اخراجات 2025 میں کمی کا اعلان
وفاقی وزیر برائے مذہبی امور و بین المذاہب ہم آہنگی چوہدری سالک حسین نے رواں سال حج پیکج کے اخراجات میں کمی کا اعلان کرتے ہوئے عازمین حج کو مالی ریلیف فراہم کرنے کا اعلان کیا ہے۔

پریس کانفرنس سے خطاب کرتے ہوئے وفاقی وزیر نے کہا کہ 40 روزہ حج پیکج کی لاگت میں 25 ہزار روپے کی کمی کے بعد مجموعی لاگت 10 لاکھ 50 ہزار روپے، جب کہ 50 ہزار روپے کی کمی کے بعد 25 دن کے مختصر حج پیکج کی لاگت 11 لاکھ روپے آئے گی۔

انہوں نے کہا کہ اس سال حج کے موقع پر تمام کمرے اور خیمے ایئر کنڈیشنڈ ہوں گے۔

وفاقی وزیر کا کہنا تھا کہ ’حکومت کا حج کوٹہ بھر چکا ہے، اب کوئی اضافی درخواست قبول نہیں کی جائے گی۔‘

آبادی کو مد نظر رکھتے ہوئے سعودی حکومت کی جانب سے سال 2025 کے لیے پاکستان کا حج کوٹہ ایک لاکھ 79 ہزار مختص کیا گیا ہے، حکومت نے حج کوٹے کو دو حصوں میں تقسیم کیا ہے، سرکاری حج اسکیم کے تحت آدھا کوٹہ حکومت کی جانب سے برقرار رکھا گیا ہے، جب کہ بقیہ آدھا کوٹہ پرائیویٹ ٹور آپریٹرز کے لیے رکھا گیا ہے۔

ہر حاجی کو پاکستانی قومی پرچم بنا ہوا ایک خصوصی طور پر ڈیزائن کردہ بیگ ملے گا، جس میں شناخت کے لیے کیو آر کوڈ اور متعلقہ معلومات بھی شامل ہوں گی۔

’پاک حج‘ نامی ایک خصوصی موبائل ایپ عازمین کو ان کے موبائل فون پر تمام معلومات فراہم کرے گی جس سے وہ اپنے حج گروپ کی معلومات، تربیتی شیڈول، پرواز کی تفصیلات، سعودی عرب میں رہائش اور حج کے دوران مقامات کے براہِ راست نقشے اور مقامات کے حوالے سے آگاہ رہ سکیں گے۔

اے پی پی کے مطابق وفاقی وزیر کا کہنا تھا کہ ’تمام عازمین حج کو تیسری قسط 6 سے 14 فروری کے درمیان حکومت کے نامزد کردہ بینکوں میں جمع کروانی ہوگی۔‘

ان کا مزید کہنا تھا کہ ’وزارت نے اس بات کو یقینی بنایا ہے کہ ہر عازم کو ’پاک حج‘ موبائل ایپلی کیشن کے ذریعے قسط کی ادائیگی سے متعلق نوٹی فکیشن موصول ہو۔‘

ایک اور اہم پیش رفت کا ذکر کرتے ہوئے انہوں نے 2024 کے عازمین حج کو 4 ارب 75 کروڑ روپے سے زائد کی رقم واپس کرنے کا بھی اعلان کیا۔

انہوں نے بتایا کہ ریفنڈز کو منیٰ میں رہائش، مکہ مکرمہ میں قیام اور مکتب ’سی‘ جیسے عوامل کی بنیاد پر سات مختلف کیٹیگریز میں تقسیم کیا گیا ہے، مزید برآں قربانی کے ریفنڈ اور جہاز کے کرایوں میں کمی سے حاصل ہونے والی بچت بھی عازمین حج کو منتقل کی جا رہی ہے۔

ریفنڈ کے عمل کے اعداد و شمار پر روشنی ڈالتے ہوئے وزیر نے کہا کہ 14 فیصد عازمین (9,588 افراد) کو 20 ہزار روپے ملیں گے، 5 فیصد (3,358 افراد) کو 35 ہزار روپے، 19 فیصد (12,981 افراد) کو 50 ہزار روپے، 23 فیصد (16,037 افراد) کو 75 ہزار روپے، 26 فیصد (17,828 افراد) کو 90 ہزار روپے ملیں گے، جب کہ 10 فیصد (6784 افراد)کو ایک لاکھ 10 ہزار اور 3 فیصد (2,228 افراد) کو ایک لاکھ 40 ہزار روپے ملیں گے۔

تاہم ریفنڈز نامزد بینکوں کی برانچز کے ذریعے ہی منتقل کیے جائیں گے۔

انہوں نے آگاہ کیا کہ کہ عازمین حج کو بروقت مالی ریلیف یقینی بنانے کے لیے نامزد بینکوں کو فنڈز کی منتقلی آئندہ دو روز میں شروع ہوجائے گی