بھارتی کرکٹ بورڈ کا ایشین کرکٹ کونسل کے اجلاس میں شرکت کا فیصلہ

بھارتی کرکٹ بورڈ نے ایشین کرکٹ کونسل کے سالانہ اجلاس میں شرکت کے حوالے سے بڑا یو ٹرن لیتے ہوئے اہم میٹنگ میں ورچوئلی شرکت کرنے کا فیصلہ کر لیا ہے۔

کرکٹ ویب سائٹ کرک انفو کی رپورٹ کے مطابق ایشیا کپ 2025 کا مستقبل غیر یقینی صورت حال سے دوچار ہے، مئی 2025 میں پاک- بھارت کشیدگی کے بعد سے ٹورنامنٹ کے انعقاد پر سوالیہ نشان لگا ہوا ہے اور اب اس کا فیصلہ آج (24 جولائی) کو ایشیائی کرکٹ کونسل کے سالانہ جنرل اجلاس میں متوقع ہے۔

اجلاس کی نوعیت اہم ہونے کے باوجود اس پر غیر ضروری توجہ مرکوز ہوئی، اب بورڈ آف کنڑول فار کرکٹ اِن انڈیا (بی سی سی آئی) اجلاس میں فزیکلی نہیں بلکہ آن لائن شرکت کرے گا، بی سی سی آئی کی جانب سے راجیو شکلا بھارت کی نمائندگی کریں گے۔

یہ واضح نہیں ہو سکا کہ سری لنکا کرکٹ بورڈ کا نمائندہ اجلاس میں ذاتی حیثیت میں شریک ہوگا یا پھر ورچوئلی حصہ لےگا۔

ابتدائی اطلاعات کے مطابق اے سی سی اجلاس میں افغانستان اور عمان کی شرکت مشکوک تھی تاہم اب دونوں ممالک اجلاس میں شریک ہوں گے، نیپال، بھارت کی پیروی کرتے ہوئے ورچوئلی شرکت کرے گا۔

ایشیا کپ 2025، جس میں 8 ٹیمیں حصہ لیں گی، اجلاس کا ایک اہم ایجنڈا ہے، اگرچہ میزبانی کے حقوق بی سی سی آئی کے پاس ہیں لیکن میچز ستمبر میں متحدہ عرب امارات (یو اے ای) میں منعقد ہونے ہیں۔

یہ پہلا موقع ہے کہ بنگلہ دیش کرکٹ بورڈ کسی اعلیٰ سطح کے جلاس کی میزبانی کر رہا ہے، بورڈ کے صدر امین‌ الاسلام نے کہا کہ وہ صرف لاجسٹک (انتظامی) تعاون فراہم کر رہے ہیں، انہوں نے بی سی سی آئی یا سری لنکن کرکٹ بورڈ کے نمائندے نہ بھیجنے پر کوئی تبصرہ نہیں کیا۔

امین‌ الاسلام نے بدھ 23 جولائی کو کہا کہ ہم نے اے سی سی کے ساتھ اتفاق کیا ہے کہ اس سال کا سالانہ جنرل اجلاس ہم منعقد کریں گے، یہ ایشین کرکٹ کونسل کا پروگرام ہے، ہم صرف انہیں لاجسٹک سپورٹ دے رہے ہیں، بس یہی ہمارا کردار ہے۔

انہوں نے مزید کہا کہ ہم ایشین کرکٹ کونسل کے ساتھ رابطے میں ہیں جو ہمیں بتا رہے ہیں کہ کون آ رہا ہے اور کون نہیں، تاکہ ہم ہوائی اڈے سے استقبال، ہوٹل بکنگز اور دیگر سہولیات کا بندوبست کر سکیں۔

امین‌الاسلام اور بنگہ دیش کرکٹ بورڈ کے چیف ایگزیکٹو نظام الدین چوہدری نے 23 جولائی کو پاکستان کرکٹ بورڈ اور ایشین کرکٹ کونسل کے سربراہ محسن نقوی کا ڈھاکے کے ایئر پورٹ پر استقبال کیا۔ اسی شام ایک شاندار عشائیے کا بھی اہتمام کیا گیا ہے، جس کے بعد ڈھاکہ کے مقامی ہوٹل میں 2 روزہ اجلاس منعقد کیا جائے گا