آپ کے الفاظ دل کو چھو گئے، مہوش حیات کی حمایت پر ساحر لودھی کا اظہارِ تشکر

میزبان و اداکار ساحر لودھی نے اداکارہ مہوش حیات کی حمایت پر شکریہ ادا کرتے ہوئے کہا کہ اُن کے الفاظ دل کو چھو گئے۔

حالیہ دنوں میں ساحر لودھی سوشل میڈیا پر خوب وائرل ہو رہے ہیں، ان کے انسٹاگرام اکاؤنٹ پر کچھ ویڈیوز پوسٹ کی جا رہی ہیں جن میں وہ یہ ظاہر کرتے ہیں جیسے انہیں معلوم نہیں کہ کوئی ان کی ویڈیو بنا رہا ہے، حالانکہ کیمرہ مین بھی انہی کا ہوتا ہے اور یہ ویڈیوز بھی انہی کے پیج پر اپ لوڈ ہو رہی ہیں۔

سوشل میڈیا صارفین ساحر لودھی کی ان ویڈیوز سے خوب محظوظ ہو رہے ہیں، جن پر نہ صرف مزاحیہ میمز بن رہی ہیں بلکہ فیصل قریشی، یاسر نواز اور اعجاز اسلم جیسے فنکار بھی ان کی نقالی کرتے دکھائی دے رہے ہیں۔

تاہم، اداکارہ مہوش حیات کو یہ نقالی ویڈیوز پسند نہیں آئی تھیں، انہوں نے ساحر لودھی کے احترام کا مشورہ دیتے ہوئے لکھا تھا کہ آپ کسی کے انداز کو ناپسند کر سکتے ہیں، لیکن اس انسان کی بنیادی عزت ہمیشہ برقرار رہنی چاہیے۔

ساحر لودھی نے انسٹاگرام پر مہوش حیات کو مخاطب کرتے ہوئے لکھا کہ مہوش، تمہارے الفاظ دل کو چھو گئے۔

انہوں نے مزید لکھا کہ ایک ایسی دنیا میں جہاں تنقید کرنا تعریف کرنے سے کہیں زیادہ آسان ہے، مہوش حیات کی مہربانی اور ہمدردی ان کے لیے وہ اہمیت رکھتی ہے جو وہ لفظوں میں بیان نہیں کر سکتے۔

ساحر لودھی نے کہا کہ وہ ہمیشہ اپنی محنت، اپنے جذبے اور اپنے اصولوں کے ساتھ سچا رہنے کی کوشش کرتے ہیں، چاہے راستہ کتنا ہی مشکل کیوں نہ ہو، شکریہ کہ تم نے دنیا کو یاد دلایا کہ ہر عوامی شخصیت کے پیچھے ایک انسان ہوتا ہے جس کے جذبات اور خواب ہوتے ہیں۔

انہوں نے مزید لکھا کہ آؤ ایک ایسا معاشرہ بنائیں جہاں احترام اور ہمدردی ہو ایک دوسرے کے لیے اور ان سب کے لیے جو ہمت کرکے سامنے آتے ہیں